د روسیې د بهرنیو چارو وزیر سرګي لاوروف او د هغه ترکي سیال هاکان فیدان په یوې ټیلیفوني اړیکه کې د سوریې کړکېچ «خطرناک» وباله او په دغه هېواد کې یې د وضعیت د خرابیدو په اړه اندېښنه څرګنده کړه.
د ایران او روسیې د بهرنیو چارو وزیرانو هم په جلا جلا تماسونو کې د سوریې پر وضعیت خبرې وکړې.
د روسیې او ترکیې د بهرنیو چارو وزیرانو د حلب او ادلب په ولایتونو کې د شخړو زیاتوالي ته په اشارې سره د حالاتو د مدیریت لپاره د ګډو اقداماتو د همغږۍ پر اهمیت ټینګار وکړ.
د روسیې د بهرنیو چارو وزارت وویل، چې لاوروف له خپل ایراني سیال عباس عراقچي سره ټیلیفوني خبرې وکړې او د سوریې د ملی حاکمیت او ځمکنۍ بشپړتیا ترڅنګ یې د استانې ظرفیتونو څخه په ګټې اخیستنې د بحران پر حل ټینګار وکړ.
د ایران د بهرنیو چارو وزارت د یوې اعلامیې په خپرولو سره وویل، چې عباس عراقچي د استانې د پروسې د درېیو ضامنانو په توګه د ایران، روسیې او ترکیې ترمنځ نږدې همغږي ضروري وبلله.
د ایران د بهرنیو چارو د وزارت د خبرپاڼې له مخې، هغه هم په سوریه کې وروستي حرکتونه د لویدیځې اسیا د سیمې د بې ثباته کولو لپاره د اسراییل او امریکا د پلانونو برخه وبلله.
د ایران د بهرنیو چارو وزارت په حلب کې د دغه هېواد پر کونسلګرۍ د وسله والو بریدګرو برید غندلی دی. د دغه وزارت ویاند ویلي، ایران به دغه تېری به په جدي توګه تعقیب کړي.
د راپورونو له مخې په سوریه کې په تېره بیا په حلب ښار کې د تېرو درېیو ورځو د سختو جګړو په پایله کې تر ۲۵۰ ډېر کسان وژل شوي چې ۱۴۰ یې وسله وال او ۸۷ یې د سوریې حکومتي ځواکونه دي.
د سوریې د حکومت د مخالفو ځواکونو بریدونه د چهارشنبې په ورځ پیل شول او د راپورونو له مخې، وسله والو د حلب او ادلب ښار ځینې برخې نیولې دي.
د سوریې د بشري حقونو د څار ډلې راپور ورکړی، د سوریې ډیموکراټیکو ځواکونو له حلب څخه د ایران پلوه وسله والو له وتلو وروسته د هوايي ډګر کنټرول په لاس کې اخیستی دی.
