په کابل کې د ایران نوی سفیر وايي، چې افغانان دې هغه هېواد ته د قانوني لارو سفر وکړي
په افغانستان کې د ایران نوی سفیر علي رضا بېکدلي وايي، چې که افغانان ایران ته د تګ تکل لري؛ نو هڅه دې وکړی چې له قانوني لارو هغه هېواد ته ولاړ شي.
په افغانستان کې د ایران نوی سفیر علي رضا بېکدلي وايي، چې که افغانان ایران ته د تګ تکل لري؛ نو هڅه دې وکړی چې له قانوني لارو هغه هېواد ته ولاړ شي.
ښاغلی بېکدلي چې د شنبې په ورځ د (لېندۍ په ۱۰ مه) کابل ته رسېدلی ویلي یې دي، هغه افغانان چې په قانونی لارو ایران ته تللي نه یوازې دا چې ځورول شوي نه دي؛ بلکې د نوموړي په خبره د هغوی درناوی هم شوی دی.
ښاغلي بېکدلي د کابل په هوايي ډګر کې خبریالانو ته ویلي:« موږ هڅه کوو، چې په دې توګه د خلکو تګ راتګ زیات شي او دغه کار د دواړو هېوادونو تر منځ د اړیکو د ټینګښت لامل هم کېږي.»
خو تر ده وړاندې د ایران د کورنیو چارو وزیر اسکندر مومني خبرداری ورکړی و، چې هېواد یې د نورو افغان کدوالو د منلو وړتیا نه لري او د هغوی د اېستلو چارې د دوی په لومړیتوبونو کې دي.
بله غاړه داسې راپورونه هم په رسنیو کې خپاره شوي وو، چې ګواکې ایران هغه افغانان هم نیسي، بندیانوي او په زوره یې افغانستان ته استوي چې باسپورتونه او ویزې په لاس لري.
په دې تړاو افغانستان انټرنشنل ته هم افغانانو بې شمېره ویدیو ګانې استولې او د ایراني پولیسو له بد سلوک څخه یې شکایتونه کړي دي.
