د طالبانو د ریاست الوزرا اداري مرستیال عبدالسلام حنفي د شنبې په ورځ د لیندۍ په ۱۰مه د یوه پلاوي په مشرۍ ازبکستان ته لاړ. عبدالسلام حنفي د طالبانو تر ټولو جګپوړی ازبک چارواکی دی. طالبان وايي، دا لیدنه یې د ازبکستاني چارواکو په بلنه د اړیکو د ټینګښت په موخه کړې ده.
طالبانو په یوه خبرپاڼه کې تمه ښودلې، چې له دغه سفر وروسته به د دې ډلې او ازبکستان ترمنځ دوه اړخیزې اړیکې زیاتې شي.
د ازبکستان د لومړي وزیر مرستیال جمشید خواجیف د طالبانو پلاوي ته د تاشکند په هوايي ډګر کې هرکلی وکړ.
په تيرو درېو کلونو کې د ازبکستان پلاوي څو ځله کابل ته سفرونه کړي دي.
د تلې په ۲۰مه، د ازبکستان پلاوي له سفر وروسته طالبانو اعلان وکړ، چې د فاریاب په میدان کې د طوطي ګازو د استخراج قرارداد یې یوه ازبکستاني شرکت ته ورکړی دی.
طالبانو ویلي چې دغه شرکت به په لس کلن تړون کې په افغانستان کې د ګازو د استخراج په برخه کې شاوخوا یو میلیارد ډالر پانګونه وکړي.
