په کورمه کې د اوربند سره، سره تازه د ۱۳ کسانو د وژل کېدو خبر ورکړل شوی
د خیبر پښتونخوا په کورمه کې د فرقهییزو شخړو له امله تازه ۱۳ نور کسان وژل شوي، چې له دې سره په دغو نښتو کې د وژل شویو کسانو شمېر ١٢٤ ته لوړ شو.
د خیبر پښتونخوا په کورمه کې د فرقهییزو شخړو له امله تازه ۱۳ نور کسان وژل شوي، چې له دې سره په دغو نښتو کې د وژل شویو کسانو شمېر ١٢٤ ته لوړ شو.
يو ځايي حکومتي چارواکی وایي، سوني او شيعه جنګياليو په وار، وار د اوربند له امره سرغړونه کړې ده.
تازه جګړه د تېرې پنجشنبې په ورځ هغه مهال پیل شوه، چې د شیعه مذهبو پر دوو جلا کاروانونو چې د پولیسو تر څارنې لاندې روان وو، برید وشو چې له امله یې تر ۴۰ ډېر کسان ووژل شول.
له هغه وخت راهیسې د سپکو او درنو وسلو کارولو سره د لسو ورځو دغې جګړې د سیمې وضعیت کړکېچن کړی، لویې لارې تړل شوې او مخابراتي خدمتونه هم په ټپه درېدلي دي.
په کورمه کې یو حکومتي چارواکي عرب نیوز ته ویلي، چې په وژل شویو کې دوه یې سوني او ۱۱ یې شیعه مذهبه وګړي دي او په دغو تازه جګړو کې تر ۵۰ زیات کسان ټپیان شوي هم دي.
پولیس وایي، چې ډېری خلک غواړي د تاوتریخوالي له امله له سیمې وتښتي؛ خو د خراب امنیتي وضعیت له امله دغه چاره ناشونې شوې ده.
تېره اوونۍ د ولایتي ادارې لهخوا د اوو ورځو اوربند اعلان شو؛ خو له دغه اوربنده په وار، وار سرغړونې وشوې.
د پاکستان د بشري حقونو کمېسیون وايي، په سیمه کې د جولای او اکتوبر ترمنځ په فرقهییزو نښتو کې ۷۹ کسان وژل شوي دي.
ځیني سیمهییز بیا خلک وایي، چې شخړه په عمومي ډول په غرنیو سیمو کې د ځمکې پر سر راپورته شوې؛ خو ګڼ سیاسي کارپوهان بیا په دې باور دي، چې د دغو شخړو تر شا د سترو استخباراتي کړیو لاس دی او د یو شمېر هېوادونو لهخوا په جګړه کې د ښکېلو غاړو د وسلو رسولو او مالي ملاتړ کېږي.
