د سوریې د بشري حقونو د څار ډلې اعلان کړی، چې له حلب څخه د ایران پلوه ملېشو له وتلو وروسته د سوریې دیموکراتیکو ځواکونو د حلب هوايي ډګر تر خپل کنټرول لاندې راوستی دی. دا ځواکونه تر ډېره کرد ملېشې دي، چې د امریکا په مشرۍ ایتلاف یې ملاتړ کوي.
تر دې مخکې د سوریې د بشري حقونو د څار ډلې ويلي و، چې د سوریې دیموکراتیکو ځواکونو د حلب په شمال کې د شیعه ګانو دوه ښارګوټي نابل او الزهرا هم تر خپل کنټرول لاندې راوستي دي.
د سوریې پوځ د شنبې په ورځ (د ليندۍ ۱۰ مه) اعلان وکړ، چې له حلب ښار یې خپل ځواکونه د لنډ مهال لپاره ایستلي دي.
د سوریې پوځ زیاته کړې، چې دا وتل د هغو کسانو پر وړاندې د ځوابي برید لپاره چمتووالی دی، چې دوی یې «ترهګر» بولي.
د سوریې د پوځ د راپور له مخې په تیرو څو ورځو کې په حلب کې له وسله والو مخالفانو سره په سختو جګړو کې د سوریې په لسګونه پوځیان وژل شوی او ژوبل شوي دي.
