د لغمان ولایت د مرکز مهترلام مرکز اړوند په سراج کلا کې د “خپل هېواد خپل تولید” په نوم د کورنیو تولیداتو درې ورځنی نندارتون پرانیستل شو. د لغمان لپاره د طالبانو والي شېر احمد حقاني یې د پرانیستې پرمهال وویل، د پیاوړي اقتصاد لپاره حکومت او خلک له خپلو کورنیو تولیداتو ګټه واخلي.
د طالبانو تر واک لاندې د باختر اژانس نن سې شنبه « د لیندۍ ۲۰مه» لیکلي چې په دغه نندارتون کې د شاوخوا ۶۰ شرکتونو استازي برخه لري.
په دې نندارتون کې د پنځو ولایتونو لغمان، ننګرهار، کونړ، نورستان او کابل سوداګرو کورني تولیدات لکه مېوې، سبزي، غالۍ، تخنیکي وسایل او لبنیات نندارې ته وړاندې کړي دي.
ځايي طالب مسوولین وايی چې د لغمان کورنیو تولیداتو درې ورځنی نندارتون د ۴۰ غرفو په ګډون پرانیستل شوی دی.
د لغمان لپاره د طالبانو والي شېراحمد حقاني د یاد نندارتون د پیل په مراسمو کې وویل:«د اقتصاد حُریت او ازادۍ لپاره باید د تل لپاره له کورنیو تولیداتو استفاده وکړو، د امکان ترحده پورې باید خپل ضرورتونه له داخلي تولیداتو څخه پوره کړو، ټول مسؤلین، ادارې، خلک، سوداګر، هټۍ وال باید کورنیو تولیداتو څخه ګټه واخلي».
د طالبانو دغه چارواکي له ټولو سوداګرو وغوښتل، چې په لغمان کې د پانګونې لپاره ښه زمینه برابره ده، دلته پانګوونه وکړئ ترڅو خلکو ته د کار زمینه هم برابره شي او کورنی اقتصاد ورسره وغوړېږي.
د لغمان لپاره د طالبانو د صنعت او سوداګرۍ رئیس سلامت خان بلال وایي، چې د دغه نندارتون په ۴۰ غرفو کې کورني تولیدات درې ورځې لپاره نندارې ته وړاندې کېږي او له جوړېدو یې هدف کورنیو تولیداتو ته په کور دننه بازار موندنه ده.
په همدې حال کې طالبانو د اطلاعاتو او کلتور رییس عبدالنور رسولي بیا وویل، چې د داسې نندارتونونو په جوړېدو سره د داخلي تولیداتو د پرمختګ سربېره، د فرهنګ او کلتور په اړه هم خلک معلومات ترلاسه کوي.
