د امریکا د مرکزي استخباراتو (سي آی اې) پخوانۍ مامورې سارا اډمز د افغانستان انټرنشنل وروستي څیړنیز رپوټ ته په اشارې د طالبانو او د بشارالاسد د زندانونو وضعیت سره ورته بللی.
اډمز د صیدنایه زندان د ظلمونو تفصیل ورکړی، چې د نوموړې په وینا، هلته بندیان له بې سارو کړاوونو، ډلهييزو اعدامونو، تیریو او تیزاب پاشنې سره مخ شوي.
نوموړې د ۳۰ زره اعدامونو ثبت شمیرې ته اشاره کړې ده او وايي، چې ژوندي پاتې شوي کسان په داسې حالت کې وو چې خپل نومونه یې هم نه پېژندل.
سارا اډمر د افغانستان انټرنشنل رپوټ ته په اشارې خبرداری ورکړی، چې د امریکا له وتلو وروسته د طالبانو تر واکمنۍ لاندې د واشنګټن مخکیني ملګري او متحدان هم درې کاله له سختو شکنجو سره مخ شوي دي.
اډمز په سوریه او افغانستان کې د متحده ایالاتو پالیسي غندلې ده.
هغې پر خپل اېکس ولیکل، چې په افغانستان کې د دې ناکامۍ انعکاس ښکاري، چیرې چې متحده ایالاتو د داعش خلاف جګړې ته لومړیتوب ورکړی، خو د طالبانو او القاعدې پر ګواښونو سترګې پټوي.
اډمز وايي، « په سوریه کې موږ یوازې له داعش سره پر جګړه تمرکز وکړ او د اسد د نسکورولو پر مبارزه مو سترګې پټې کړې. اوس یې په افغانستان کې تکراروو، په داسې حال کې چې پر طالبانو او القاعدې سترګې پټوو، خو د داعش -خراسان خلاف د مصنوعي جګړې په لټه کې یو».
نوموړې زیاته کړې، چې « موږ اړخونه غوره کوو، موږ لا له بدو خلکو ګټنه کوو او په افغانستان کې دا زموږ ملګري دي چې زموږ د ماتو بیه ور کوي او ربړونې او مرګ زغمي».
اډمز خبرداری ورکړی چې د دې پالیسیو د ناکامۍ پایلې یوازې په افغانستان او سوریې پورې محدودې نه دي.
هغې د متحده ایالاتو پر اوسنۍ ترهګرۍ ضد تګلارې د بیاکتنې غوښتنه کړې ده.
