د طالبانو تر کنټرول لاندې د ټرانسپورټ وزارت د هوا پیژندنې ادارې نن او سبا په لویدیځو، مرکزي سوېل ختیځو او ختیځو ولایتونو کې د درنې واورې، باران او سېلابونو راوتلو اټکل کړی دی.
دغه وزارت په خبرپاڼه کې د نن او سبا لپاره په هرات، فراه، نیمروز، هلمند، کندهار، زابل، روزګان، غور، بادغیس، فاریاب، جوزجان، سرپل، بامیان، ډایکنډي، پکتیکا، غزني، پکتیا، خوست، لوګر، میدان وردګ، سمنګان، بلخ، کندوز، بغلان، پروان، کابل، پنجشیر، او بدخشان ولایتونو کې د واورې، باران او سېلابونو راوتلو اټکل کړی دی.
د هوا پوهنې د معلوماتو له مخې د سالنګونو په ګډون د باران کچه په بېلابېلو سیمو کې له ۱۵ تر ۴۰ ملي مترو پورې او د واورې کچه له ۱۰ تر ۵۰ ساتني مترو پورې اټکل شوې ده.
همدارنګه د طالبانو د اوبو او انرژی وزارت وايي، د سې شبنې او چهار شنبې په ورځ د ناڅاپي اورښتونو، وارو او سېلابونو راوتلو له امله د تالقان، بغلان، سمنګان، ارغنداب، ترنک، هلمند، هرات او فراه سیندونو کې د اوبو کچه لوړیږي.
دغه وزارت د دغو سیندونو په غاړو او لاندېنیو سیمو کې میشتو کورنیو ته خبر ورکوي، چې د مالي او ځاني زیان د مخنیوي په موخه له یادو سیمو څخه لیري اوسي.
د هوا پوهنې اداره په داسې حال کې د هېواد په ګنو ولایتونو کې د واورې او بارانونو اوریدو او سېلابونو د راوتلو خبر ورکوي، چې د روان کال په پیل کې د اقلیم د بدلون له امله په ډیری ولایتونو کې د سختو سېلابونو راوتلو پر مهال ګڼو کسانو ته ځاني او مالي زیانونه واوښتل.
