د طالبانو د بهرنیو چارو وزارت سیاسي مرستیال شېر محمد عباس ستانکزی وایي، د امریکا لهخوا د "بمونو مور" او کیمیاوي وسلو کارولو د افغانستان اقلیم ته درانه زیانونه اړولي دي.
نوموړي دغه څرګندونې نن د اقلیمي بدلون د ۲۹مې نړۍوالې غونډې د پایلو او اغېزو د ارزونې په کنفرانس کې کړې دي.
ښاغلي ستانکزي زیاته کړې: «د پخواني شوروي اشغال پر مهال د جګړو له امله د افغانستان ۸۰ سلنه ځنګلونه له منځه تللي.»
د هغه په وینا، د اقلیمي بدلون ناورین د «اشغال» پرمهال پیل شوی او دغې ډلې ته په میراث پاتې دی.
ښاغلي ستانکزي د دغه ناورین د حل لپاره د هېواد د اوبو د کنټرول او مدیریت پر اهمیت هم ټینګار وکړ.
په دغې غونډه کې د طالبانو د چاپېريال ساتنې ملي ادارې عمومي مشر مطيع الحق خالص ويلي، چې اقليمي بدلون يوه نړۍواله ستونزه ده چې پر وړاندې یې د مبارزې لپاره ګډو اقداماتو ته اړتیا ده.
د هغه په وینا، که نړۍوال له افغانستان سره په دې برخه کې همکاري و نه کړي؛ نو دغه ناورین به نړۍ هم وځپي.
له بل پلوه په دغې غونډه کې د طالبانو د اقتصاد وزارت مسلکي مرستیال عبداللطیف نظري په دغې غونډه کې د وینا پرمهال پر طالبانو د بندیزونو او محدودیتونو د لرې کولو غوښتنه کړې.
د هغه په وینا، د دغو بندیزونو او محدودیتونو لرې کول د افغانانو حق دی.
د اقتصاد وزارت مسلکي مرستیال د اقلیمي بدلون پر وړاندې د مبارزې په برخه کې له افغانستان سره همکاري د هېوادونو مسوولیت بللی دی.
