د جنوري ۲۴مه د پوهنې نړۍوالې ورځې په پلمه، د ملګرو ملتونو له ماشومانو د ملاتړ صندوق (یونیسف) وايي، چې تیر کال په افغانستان کې ۱۱۰ ښوونځي د سېلابونو له امله زیانمن یا ویجاړ شوي. یونېسف په افغانستان کې د اقلیمي بدلون په وړاندې د خوندي زدهکړو لپاره د لا زیاتې پانګونې غوښتنه وکړه.
یونېسف د ایکس ټولنیزې رسنۍ په یوه یادښت کې لیکلي چې د دغو ښوونځیو ویجاړېدو د زرګونو افغان زدهکوونکو د زدهکړو بهیر ګډوډ کړی دی.
په تېر ۲۰۲۴ کال کې د اقلیمي بدلون له امله د افغانستان په بېلابېلو ولایتونو کې سخت سېلابونه راغلل، چې سلګونه کورونه او عامه بنسټونه یې ویجاړ کړل.
د پوهنې نړۍوالې ورځې په را رسېدو، ۱۲۲۵ ورځې کیږي چې طالبانو په افغانستان کې له شپږم ټولګي پورته د نجونو او د پوهنتون په ښځینه زدهکړیالانو د زدهکړو دروازې تړلې دي او هغوی یې له زدهکړو بې برخې کړې دي.
په دې وروستیو کې د طالب چارواکو تر منځ د دغې ډلې د بهرنیو چارو وزارت مرستیال عباس ستانکزی او یو شمېر نور طالب چارواکي د دغې ډلې د مشر ملا هبتالله د فرمان په وړاندې درېدلی او د افغان نجونو د زدهکړو پر بندیز یې نیوکې کړې دي.
هغو د خپل مشر دغه کار له اسلامي شریعت سره په ټکر کې بللی او غوښتنه یې کړې چې د افغان نجونو لپاره دې د زدهکړو بندیز لرې کړل شي.
