په اسلام اباد کې د طالبانو سفیر سردار احمد شکیب د دې ډلې بهرنیو چارو وزارت ته په یوه رسمي مکتوب کې د پاکستان له لوري د چین او امریکا ترمنځ د اړېکو ساتلو په موخه د افغانستان پر سر سودا کولو په اړه خپلې اندیښنې شریکې کړې دي.
د « طالب لیکس» له خوا د خپرو شویو اسنادو له مخې، دغه ۹۱مه ګڼه مکتوب د ۱۴۰۳ کال د چنګاښ میاشتې پر اتمه په اسلام اباد کې د طالبانو سفارت د دې ډلې بهرنیو چارو وزارت ته لیږلی. په مکتوب کې نوموړي په یوه کنفرانس کې د پاکستان د سفیر مسعود خان د یوې وینا په اړه اندېښنه ښودلې، چې دده په باور، د افغانستان په اړه منفي ذهنیت جوړوي.
دغه کنفرانس د سوېلي اسیا انستیتوت ویلسن مرکز له خوا جوړ شوی و او مسعودخان پکې وینا درلوده.
په کنفرانس کې د پاکستان سفیر د پاکستان او امریکا ترمنځ پر قوي امنیتي اړیکو او د استخباراتي همکاریو پر پیاوړتیا ټینګار کړی و.
په مکتوب کې ویل شوي د پاکستان سفیر د غونډې برخه والو ته ویلي، چې پاکستان د تروریستي شبکو د له منځه وړو په موخه یو پریکړه لیک تصویب کړی او د دغه کار لپاره اسلام اباد پرمختللو سپکو وسلو او مخابراتي وسایلو ته اړتیا لري.
د پاکستان سفیر په دغه کنفرانس کې ویلي، چې د اسلام اباد او واشنګټن ترمنځ اړیکې د سیمه ییز امنیت او د ترهګرۍ له مخ پر وده څپو سره د مقابلې لپاره چې د امریکا او د هغې د متحدینو ګټې هم ګواښي، خورا مهمې دي. نوموړي ویلي، « موږ ګډ ارزښتونه لرو، زموږ امنیتي او اقتصادي ګټې یو له بل سره تړلې دي. پاکستان غواړي یوه د عمل نقشه رامنځته کړي څو دوه اړخیز تفاهم ژور کړي او د ټولو لپاره امنیت او سوکالي راولي».
په اسلام اباد کې د طالبانو سفارت وايي، د افغانستان په اړه پاکستاني سفیر ټینګار کړی، چې په کابل کې د خپل ډیپلوماټیک حضور د بیا احیا، د ټولشموله حکومت رامنځته کولو، له ترهګرۍ سره مبارزې او په افغانستان کې د ښځو او نجونو د حقونو په اړه باید امریکا له پاکستان سره په ګډه کار وکړي.
سفارت د بهرنیو چارو وزارت ته په خپلو معلوماتو کې لیکلي داسې ښکاري چې چین ته د پاکستاني پلاوي سفر پر امریکا ښه نه دی لګیدلی او اوس پاکستاني چارواکي هڅه کوي چې واشنګټن بیرته راضي کړي یا حداقل په دې اړه لابيګري وکړي.
په دغه مکتوب کې لیکل شوي:«په داسې حال کې چې پاکستان د بیجیینګ او واشنګټن ترمنځ پښې وهي، بیا هم هڅه کوي د افغانستان پر سر سودا وکړي.»
په اسلام اباد کې د پاکستان سفارت په مکتوب کې لیکلي، « پاکستان چین او امریکا دواړو ته په مکرر ډول وايي، چې له افغانستان څخه ورته ګواښ پيښيږي او د دغه ګواښ د مهارولو لپاره باید پاکستان سره مالي او تخنیکي مرستې وشي.»
په مکتوب کې دغه راز لیکل شوي، چې سربیره پر دې په دې ورستیو کې اسلام اباد هڅه کوي چې ځان د افغان نجونو او ښځو مدافع وښيي او داځل د بشري حقونو د یو مدافع په بڼه افغانستان کې د لاس وهنو لپاره له نورو هېوادونو مرستې ترلاسه کړي.
په یاد مکتوب کې د افغانستان په اړه د اسلام اباد د نیت په اړه لیکل شوي، پاکستان هڅه کوي، چې د طالبانو او چین اړیکې خرابې کړي. «تېره ورځ د بلوچستان ایالت د کورنیو چارو وزیر ادعا وکړه، چې د تحریک طالبان پاکستان دوه غړي یې داسې مهال نیولي چې د بلوڅ ازادۍ پوځ په نامه ډلې په مرسته یې غوښتل په یاد ایالت کې نوي مرکزونه پرانیزي. د هغه په وینا، نیول شويو کسانو ورته ویلي، چې مرکزونه یې په افغانستان کې دي او پر چینايي وګړو د برید پلان یې درلود». مکتوب وايي، «له دې سره پاکستان هڅه وکړه، چې تحریک طالبان پاکستان او بلوڅ بیلتون پاله ډلې چې د چینايي پروژو اصلي مخالفین دي، له اسلامي امارت سره وتړي څو افغانستان او چین ترمنځ اړیکې خرابې او همداراز د عزم استحکام په نوم نويو عملیاتو د پیل لپاره د خلکو په منځ کې ملاتړ پیدا کړي.»
په اسلام اباد کې د طالبانو سفارت د دې ډلې د بهرنیو چارو وزارت ته په خپل تحلیل کې لیکلي، چې د اټومي وسلو له امله ستر قدرتونه د مخامخ جګړي پر ځای تل درېیمګړو هېوادونو کې جنګیږي.
مکتوب وايي، په پاکستان کې د چین او امریکا دواړو له حضور څخه داسې ښکاري چې دغه جګړه له ټایوان نه وروسته ممکن په پاکستان کې هم شروع شي، خو پاکستاني چارواکي یې د مخنیوي هڅې کوي او کوښښ کوي د جګړې پوټانشیل بېرته افغانستان ته انتقال کړي یا یې مخه ونیسي.
په دغه مکتوب کې په اسلام اباد کې د پاکستان سفارت د پاکستان او د امریکا د اسیا پاسیفیک ستراتیژی په اړه شپږ سناریوګانې د یادښت په شکل د بهرنیو چارو وزارت ته وړاندې کړې دي.
له یادو سناریوګانو څخه په یوه کې یې اشاره شوې، چې د دې لپاره چې پاکستان د لویو قدرتونو د سړې جګړې په ډګر بدل نه شي، راولپنډۍ افغانستان یا هم شاوخوا سیمو کې نوي بحران ته لمن وهي څو ستر قدرتونه هلته سره ښکر په ښکر شي.
په دغه ترلاسه شوي سند کې په کراچۍ کې د طالبانو کونسلګرۍ لیکلي، چې دغه لنډکروزر موټر یې د دغې استازولۍ د «حیثیت او اعتبار ساتنې» لپاره اخیستی دی.
دغه ترلاسه شوی مکتوب د تېرکال کب میاشتې پورې تړاو لري.
د دغه مکتوب له مخې، دغه ۲۰۱۴ ماډل موټړ تور رنګ لري چې د طالبانو د بهرنیو چارو وزیر امیرخان متقي په «شفاهي» امر د ۴۱زره او ۴۶۳ ډالرو په ارزښت اخیستل شوی دی.
دغه موټر په کراچۍ کې د طالبانو کونسل عبالجبار تخاري لهخوا اخیستل شوی دی.
په دې وروستیو کې یوې ناپېژاندې ډلې د طالبانو د ادارو او وزارتونو اړوند زرګونه سندونو په خپرولو سره ادعا کړې، چې د دغې ډلې اطلاعاتي بانک یې هېک کړی دی.
د طالبانو مخابراتو وزارت منلې، چې د دغې ډلې د لسګونو ادارو سندونه افشا شوي؛ خو په وینا یې، د طالبانو د مرکزي حکومت ډېټابېس بیا نه دی هېک شوی.
د سعودي عربستان حکومت د ترافیکي جریمې د نهورکړې له کبله د کونسلګرۍ موټرونو لپاره د موټر چلونې د جوازونو صادرول او تمدېدول بند کړي دي.
د دغه مکتوب پر بنسټ، د کونسلګرۍ موټرونه د طالبانو د حج او اوقافو وزارت تللي پلاوي ته سپارل شوي وو او دغه پلاوي د سعودي د موټر چلونې قوانین نه دي رعایت کړي.
د طالبانو د بهرنیو چارو وزارت د سلواغې په ۴مه د حج او اوقافو وزارت ته یو لیک لېږلی او له هغوی څخه یې غوښتي، چې د کونسلګرۍ د نقلیه وسایطو ترافیکي جریمه پرې کړي.
په لیک کې راغلي: «د کوربه هېواد [سعودي عربستان] له ترافیکي قوانینو سره سم، د ترافیکي جریمې سرغړونې له کبله ۸ زره او ۸۱۰ ډالر [جریمه] شوي دي.»
په دغه لیک کې څرګنده شوې، چې سعودي عربستان «د هغو نقلیه وسایطو چې د حج او اوقافو وزارت له خوا کارول شوي وو» د جریمې د نهپرې کولو له کبله په جده کې د طالبانو کونسلګرۍ د نقلیه وسایطو لپاره د جواز صادرول او تمدیدول بند کړي دي.
په مکتوب ښکاري، چې د طالبانو د بهرنیو چارو وزارت له حج او اوقافو وزارت څخه د دغې جریمې د پرېکولو په موخه د سملاسي اقدام غوښتنه کړې ده.
دا په داسې حال کې ده، چې تېره اوونۍ د «طالبلیکس» په نوم د هېکرانو یوې ناپېژاندې ډلې د طالبانو پر اطلاعاتي شبکو سایبري برید وکړ او د دغې ډلې د یو شمېر مهمو بنسټونو اسنادونو ته یې لاسرسی وموند.
د یادونې ده، چې د هېکرانو له خوا د طالبانو ګڼ شمېر اسنادونه افغانستان انټرنشنل ته رسېدلي، چې پهکې د دغې له بېلابېلو معاملو او پټو مسایلو پرده پورته کوي.
د پاکستان د بهرنیو چارو وزارت د ۲۰۲۴ کال د جولای په ۲۴مه په اسلاماباد کې د طالبانو سفارت ته د دغو بریدونو یو نوملړ لېږلی او له دغې ډلې یې غوښتي، چې د دا ډول پېښو د تکرار مخه ونیسي.
د پاکستان د بهرنیو چارو وزارت د نوملړ پر بنسټ، ټيټيپي وسلهوالو د دوو اونیو په موده کې د خېبرپښتونخوا په شمالي وزیرستان، سوېلي وزیرستان، خېبر، کُرمه، بنو، اورکزيو، ټانک، دېره اسماعیل خان او باجوړ کې بریدونه کړي دي.
طالبانو ته د پاکستان د بهرنیو چارو وزارت لېږل شوی لیک
پاکستان په دغه لیک ویلي، هغو وسلهوالو چې دا بریدونه یې ترسره کړي د محسود، حافظ ګل بهادر او عالم خان ډلو اړوند دي.
پاکستان ادعا کړې، چې د دې ډلو مشران د افغانستان په پکتیکا، خوست او ننګرهار ولایتونو کې اوسېږي.
د پاکستان د بهرنیو چارو وزارت دغه لیک په اسلاماباد کې د طالبانو سفارت په کابل کې د دغې ډلې د بهرنیو چارو وزارت ته لېږلی دی.
په لیک کې راغلي، پاکستان ادعا کړې چې په افغانستان کې مېشتو وسلهوالو ډلو د دوو اونیو په ترڅ کې په سرحدي سیمو کې ۲۲ بریدونه کړي دي.
د پاکستان په خاوره کې د وسلهوالو بریدونو په تړاو په اسلاماباد کې د طالبانو سفارت لیک
پاکستان په وار - وار پر افغان طالبانو تور لګولی، چې په افغانستان کې یې د ټيټيټي ډلې جنګیالیو ته پناه ورکړې ده.
پاکستاني چارواکي وايي، چې ټيټيپي د پاکستان په خاوره کې د ترهګریزو بریدونو د ترسره کولو لپاره له افغان خاورې کار اخلي، خو طالبانو بیا دا ادعا رد کړې ده.
دغه ۶۴۲ ګڼه مکتوب د ۱۴۰۳ کال د مرغومې میاشتې په ۳مه د طالبانو امنیتی همکاريو او سرحدي چارو ادارې په پاکستان کې د طالبانو سفارت ته لېږلی او له هغوی یې غوښتې، چې د کوربه هېواد اړوند وزارت ته يې وليږي.
په مکتوب کې د ۲۰۲۴ کال د ډسمبر مياشتې له ۲۵ څخه بیا د ۲۰۲۵ کال د جنوري تر ۳ مې پورې د پاکستاني ځواکونو د بې پيلوټه الوتکو او د ډیورنډ کرښې څخه پر افغان خاوره د وسله والو بريدونو مکمل جزئيات او د سیمو (کوردینات) لیکل شوي دي.
په مکتوب کې په ډاګه شوې، چې په همدې جريان کې د پاکستان نظامي ځواکونو په پکتیا، پکتیکا، خوست، غزني، کندهار او هلمند ولایتونو کې د بې پيلوټه او جټ الوتکو ۱۶ هوايي ګزمې تر سره کړې دي.
د مکتوب د مالوماتو له مخې، د ۲۰۲۴ کال د ډسمبر مياشتې پر ۲۵ مه نېټه د پاکستان پوځ یوې الوتکې د پکتیکا په وړممۍ ولسوالۍ کې ډیورنډ کرښې ته نژدې خپل پوځيان کښته کړل او په سيمه کې يې دوه کورونه وسوځول.
د مالوماتو پر بنسټ، له همدې پيښې سره هم مهاله دوو بې پيلوټه الوتکو پر پاکستاني نظاميانو پهره کوله.
په مکتوب کې راغلي، چې د ډسمبر میاشتې پر ۲۶ مه نېټه د پاکستان بې پیلوټه الوتکو په جلا وختونو کې د خوست په ځاځي میدان ولسوالۍ، د پکتیکا په برمل او شکین ولسواليو او د پکتیا په ډنډپټان ولسوالۍ کې هوايي ګزمې کړې.
د مالوماتو له مخې، د همدې میاشتي په ۲۷ مه دوو بې پيلوټه پاکستانۍ الوتکو د کندهار په شورابک، په ۲۸مه نېټه د پکتیکا په شکین، په ۲۹مه نېټه د پکتیا په ډنډ پټان او د پکتیکا په برمل ولسوالۍ کې هم ګزمې تر سره کړې دي.
پاکستاني بې پیلوټه الوتکو د ډسمبر مياشتې په ۳۰ مه د هلمند په بهرامچه، د خوست په ګربز، د پکتیا په اریوب ځاځیو ولسواليو او د غزني پر مرکز هم هوایي ګزمې کړې دي.
په دغه مکتوب کې طالبانو د پاکستان دغه کړنې د افغانستان د فضايي حریم ښکاره سرغړونه ياده کړې ده.
طالبانو په خپل دې ۶ مخیز مکتوب کې په بشپړو جزئياتو سره ليکلي، چې د پاکستان پوځيانو له ډيورنډ کرښې دې خوا د پکتیا، پکتیکا، خوست او کونړ بيلابيلو سيمو ته توغندي توغولي او د طالبانو پر تاسیساتو يې هم وسله وال بريدونه کړي دي.
په مکتوب کې راغلي، چې د ډسمبر مياشتې پر ۲۵مه نېټه پاکستاني پوځيانو له ډيورنډ کرښې څخه د خوست پر عليشير او سپيرې او د پکتیکا پر برمل ولسوالیو توغندي توغولي دي.
په دغه سند کې پر افغان خاوره د پاکستاني پوځیانو د سپکو او درندو وسلو د بريدونو اړوند راغلي: « د ډسمبر په ۲۷مه د پکتیا د ډنډ پټان، په ۲۸مه د پکتیکا په شکين، د پکتیا په اريوب ځاځي، د خوست په ځاځي میدان او ګربز او په ۳۰مه د کونړ سرکاڼو ولسواليو کې د هاوان د مرمیو بریدونه کړي.»
طالبانو ویلي، چې د پاکستان د همدې سرغړونو په اړه يې اندېښنه ښودلې او خپل اعتراض يې هم څرګند کړی خو تر اوسه کوم پرمختګ نه دی لیدل شوی.
د طالبانو د دې افشاشوي مکتوب په وروستۍ برخه کې راغلي، چې د ډیورنډ فرضي کرښې په اوږدو کې دا ډول ترینګلتیاوې د دواړو هېوادونو په زيان دي، چې باید مخه یې ونیول شي.
پر افغان خاوره د پاکستان د بې پيلوټه الوتکو د ګزمو او ډيورنډ کرښې څخه د بريدونو مکتوب په داسې حال کې افشا کيږي، چې افغانستان انټرنشنل څو ځله په همدې سيمو کې د بي پيلوټه الوتکو د ګزمو خبرونه ورکړي دي.