د روزګان لپاره د طالبانو د امنيه قومندانۍ وياند وايي، د ګېزاب ولسوالۍ په تالې سيمه کې د غر ښويدنې په پېښه کې د یوې کورنۍ د ښځو او ماشومانو په ګډون ۶ تنه مړه شوي دي. خو ځايي خلک وايي، چې په دې پېښه کې اته کسان مړه شوي دی.
په روزګان کې کې د طالبانو امنیه قومندانۍ ویاند بلال روزګاني د جمعې په ورځ ويلي، چې دغه پېښه تېره شپه ناوخته د ګېزاب ولسوالۍ د تالې سيمې د سرمورۍ په کلي کې شوې.
نوموړي ويلي، له غر ښويدو وروسته د یوه کور چتونه پرېوتي، چې د ښځو او ماشومانو په ګډون ۶ تنه تر خاورو او ډبرو لاندې او مړه شوي دي.
له سيمې افغانستان انټرنشنل ـ پښتو ته په رسېدلې ويډيو کې خلک وايي، چې په دې پېښه کې ۸ کسان مړه شوي دي.
د سيمه یيزو خلکو په خبره، د غرښويدنې له کبله د همدې کلي زياته نوره برخه هم ويجاړه شوې.
بلال روزګاني وایي، چې سيمې ته يې ځواکونه رسېدلې تر څو دغه کسان له خاورو را وباسي.
په افغانستان کې وروستيو طبعي پېښو، بارانونو، سېلابونو او اورښتونو ګڼو کورنيو ته د ځاني زيان تر څنګ مالي تاوانونه هم اړولي.
