یوناما د څلورم پرله پسې کال لپاره د نجونو پر زده کړو بندیز زیانناک بللی
په افغانستان کې د ملګرو ملتونو سیاسي استازولۍ (یوناما) د نجونو د زده کړو پر بندیزونو خواشیني ښودلې، چې د څلورم پرله پسې کال لپاره طالبان نجونې له منځنۍ زده کړو منع کوي.
په افغانستان کې د ملګرو ملتونو سیاسي استازولۍ (یوناما) د نجونو د زده کړو پر بندیزونو خواشیني ښودلې، چې د څلورم پرله پسې کال لپاره طالبان نجونې له منځنۍ زده کړو منع کوي.
په کابل کې د یوناما دفتر د چهارشنبې په ورځ په افغانستان کې د نجونو پر وړاندي د زده کړو د بندیزونو اړوند د خواشینۍ په يوه اعلامیه کې ویلي، چې د طالبانو دغه کړنې د نجونو ترڅنګ د هېواد راتلونکې سوکالۍ ته هم زيان اړوي.
په خبرپاڼه کې په افغانستان کې د ملګرو ملتونو د سرمنشي ځانګړې استازې او د یوناما مشرې روزا اوتنبایوا له قوله ویل شوي: «په افغانستان کې نوی ښوونيز کال پيل شو خو بیا هم په ټولګيو کې د نجونو له څرګند او زیان رسوونکي نشوالي سره. دا کړنه نه یوازې د دوی راتلونکی زيانمنوي بلکې د ټولو افغانانو سولې او سوکالۍ ته هم زيان رسوي.»
د یوناما مشرې ناهيلې وښوده، چې طالبان د یوې جګړه ځپلې ټولنې غوښتنې له پامه غورځوي.
هغې د همدې بنديزونو د لرې کېدو غوښتنه وکړه.
روزا اوتنبایوا له نړيوالې ټولنې څخه د افغانستان د لرې کېدو یو لامل پر زده کړو د طالبانو همدا بندیزونه یاد کړي دي.
«دا بندیزونه یو له هغو اصلي دلایلو دي، چې افغانستان يې په دوامداره توګه له نړيوالې ټولنې څخه د انزوا لور ته وړی دی.»
هغې له مرستندویه ټولنو څخه غوښتنه وکړه، چې د پوهې په برخه کې د افغان خلکو ملاتړ وکړي.
