د پښتونخوا ایالت د اطلاعاتو دفتر په یوې خپره کړې اعلامیه کې ویلي، چې د کرک ولسوالۍ لکي غونډګۍ ته نږدې د انډس پر لویه لار په یوه مساپر وړونکي موټر د کانټینر چپه کېدو په پېښه کې ۱۰ کسان مړه شوي دي.
خبرپاڼه زیاتوي، چې یاد مساپر وړونکی موټر له میرانشاه څخه د پېښور پر لور روان و، چې د یوې لارۍ څخه پرې کانټینر راپروت.
ویل کېږي، چې په مړو شویو کې ښځې او ماشومان هم شامل دي.
د بېړنیو مرستو ادارې ایکسپریس نیوز ته وویل: «په موټر کې ۱۶ تنه مساپر سپاره وو، چې ۱۰ تنه یې ځای پر ځای مړه شوي او ۶ نور ټپیان دي.»
دغې ادارې زیاته کړې، چې په ټپیانو کې د دریو روغتیایي حالت نازک او د اندېښنې وړ دی.
د پښتونخوا والي فضل کریم کنډي په دغه پېښه خواشیني ښودلې او ویلي یې دي، چې د زیانمونو شویو کورنیو سره په دغه غم کې ځان شریک بولي.
د پښتونخوا د لویو لارو د کنټرول ادارې د یادې پېښې لامل د کانټينر لېږدونکي موټر بې احتیاطي په ګوته کړې ده.
د پاکستان ایکسپریس نیوز راپور ورکړی، چې د بلوچستان په مستونګ او کویټه کې په دوو جلا پېښو کې ۶ پاکستاني پولیس وژل شوي او ۲۰ نور ټپیان دي. بلوچستان په دې وروستیو د پاکستان امنیتي ځواکونو ته تر ټولو په نا امنه سیمه بدله شوې.
لومړۍ پېښه پرون د بلوچستان ایالت مستونګ ولسوالۍ د کهنډ مهسوري سیمې ته نږدې په دشت سړک هغه مهال رامنځته شوه، چې د پولیسو د لېږدونې پر یو بس موټر بمي چاودنه وشوه.
پولیسو رسنیو ته ویلي، چې په دغه چاودنه کې ۳ پولیس وژل شوي او ۱۹ نور ټپیان دي.
د ایکسپریس نیوز په راپور کې راغلي، چې چاودنه په یوه موټرسایکل کې د ځای پر ځای شوو چاودېدونکو توکو د چاودېدو له امله چې له لېرې ځایه کنټرولېدل رامنځته شوې ده.
د بلوچستان پولیسو په خپره کړې خبرپاڼه کې د دوه ټپي شویو پولیسو روغتیایي حالت نازک ښودلی دی.
بلخوا بیا دغې پاکستاني رسنۍ په یوه جلا راپور کې ویلي، چې د پلوچستان د کویټې ښار د نیو سریاب پولیسو په څوکۍ د نامعلومو وسله والو په برید کې ۳ پولیس وژل شوي او یو بل پولیس ټپي دی.
پولیسو ویلي: «دوی پر چای څښلو بوخت وو، چې د نامعلومو کسانو لخوا پرې بې دریغه ډزې وشوې.»
د بلوچستان امنیتي چارواکو رسنیو ته په خبرو کې وویل: «ترهګر په موټر سایکل سپاره راغلي او له ډزو کولو ورسته له سیمې تښتېدلي دي.»
چارواکو زیاته کړې، چې د دغه پېښې د عاملینو د نیولو لپاره یې په سیمه کې عملیات پیل کړي دي.
د بلوچستان سر وزیر سرفراز بګټي په دغو پېښو ژوره خواشیني ښودلې او ویلي یې دي چې حکومت کمزوری نه دې، خپلو دښمنانو ته به بشپړ ځواب ووایي.
یاده دې وي، چې پاکستان کې د نا امنیو پېښې خورا زیاتې شوي، بلوچستان او پښتونخوا هغه ایالاتونه دي چې زیات وخت ترې د نا امنیو خبرونه ترلاسه کیږي.
د ملګرو ملتونو د وګړو صندوق وایي، چې د روان کال د اپرېل له پیل راهیسې له پاکستان څخه د افغان کډوالو د جبري ستنېدنې د دویم پړاو پرمهال ۱۷ مېرمنو په صفري نقطو کې په خوندي ډول ماشومان زېږولي دي.
د دغه سازمان لهخوا په خپاره شوي راپور کې د سلما په نوم د یوې افغان کډوالې کیسه هم راغلې.
سلما د ننګرهار ولایت ده؛ خو له ۱۵ کلونو راهیسې یې له خپلې کورنۍ سره په پاکستان کې ژوند کاوه.
هغه د هغو کسانو په ډله کې وه، چې د پاکستان لهخوا د افغانانو د جبري بېرته ستنولو پرمهال افغانستان ته ستنه کړل شوه.
د سلما لپاره له پاکستان نه د اېستلو مسله د حیرانتیا خبره وه او هغې دا تمه نه لرله، چې هغه به افغانستان ته د بېرته ستنېدو سره سم یو نوی ژوند وزېږوي.
سلما د ۳۸ اونیو مېندواره وه، کله چې هغې له پاکستان څخه د افغانستان خواته روان شول.
سلما وایي: «دا زما لپاره یو ستونزمن سفر و؛ ځکه چې زه د ۳۸ اونیو مېندواره وم.»
هغې وویل: «ما وېره لرله او نه پوهېدم، چې څه وکړم؛ خو له نېکه مرغه روغتیایي کارکوونکي د طبي مرستو چمتو کولو لپاره راغلل. دوی زه د تورخم صفري نقطې کې د ملګرو ملتونو لهخوا ملاتړ شوي روغتیایي مرکز ته یوړم.»
په دغه روغتیایي مرکز کې روغتیاپاله صدیقه وایي، که څه هم د سلما خپل وضعیت ښه نه و؛ خو هغه مهال نوموړې تر ځان ډېره د خپلې کورنۍ د هغو غړو په اړه اندېښمنه وه، چې په پاکستان کې پاتې دي.
د ملګرو ملتونو د وګړو صندوق وایي، چې د خپلو شریکانو سره او د انګلستان د حکومت په ملاتړ چمتو دي، چې په سرحدونو کې د مور او نوي زېږېدلو ماشومانو د پاملرنې او رواني ټولنیز ملاتړ خدمتونه چمتو کړي؛ ترڅو د زیان منونکو خلکو او په ځانګړې توګه د مېرمنو، نجونو او ځوانانو ملاتړ وکړي.
خو سلما اوس په افغانستان کې د سرپناه د نشتوالي له امله اندېښمنه ده.
سلما وایي: «موږ لا تر اوسه د ژوند کولو لپاره سرپناه نلرو او زه اندېښمنه یمه، چې موږ به اخر چېرې ځو. د دغه بد وضعیت سره، سره زه د خپل نوي زېږېدلې ماشومې راتلونکې لپاره فکر کوم او په خپل هېواد کې د خپلې کورنۍ لپاره د ښه ژوند دعا کوم.»
د کډوالۍ نړۍوال سازمان د راپور له مخې، د روان کال (د مارچ له ۲۳مې) څخه (د اپرېل تر ۵ مې) پورې له پاکستان او ایران څخه له ۱۳۰ زرو ډېر کسان افغانستان ته تللي دي. له دغې شمېرې څخه له ۶۴زرو ډېر کسان یې له پاکستانه تللي دي، چې د ستنېدو پرمهال ځینې مېرمنې مېندواره وې.
د پاکستان حکومت د رسمي شمېرو له مخې، یوازې د تېرې دوشنبې په ورځ (د وري میاشتې ۲۵مه) د تورخم له لارې د پاکستان حکومت ۳۲۴۲ افغان کډوال په جبري توګه افغانستان ته ستانه کړي دي.
په خپرو شویو شمېرو کې راغلي، چې په دغه ستانه کړی شویو کې ۱۳۸۹ کسان د (ACC) کارت درلودونکي او ۱۸۵۳ بې اسنادو افغان کډوال شامل دي.
خبریالانو ته په لېږل شویو معلوماتو کې ویل شوي، چې یاد کډوال په پښتونخوا، پنجاب او کشمیر ایالتونو کې د عملیاتو پر مهال نیول شوي او خپل هېواد ته لېږدول شوي دي.
د معلوماتو له مخې، د کډوالو د ستنولو په دویم پړاو کې تر دې مهاله ۳۷۱۵۱ افغانان چې ۲۰۴۴۷ یې د (ACC) کارت لرونکي او ۱۶۷۰۴ بې اسنادو کډوال دي، د تورخم له لارې په جبري ډول ستانه کړی شوي دي.
د پاکستان حکومت په خپرو کړو شمېرو کې د ۲۰۲۳ کال راپه دې خوا ۵۶۰۵۳۴ کډوال په جبري توګه افغانستان ته ستانه کړي دي.
بل خوا بیا په پاکستان کې د افغان کډوالو د ټولنې مشر محمد تادین خان د دغه هېواد په فېډرالي حکومت غږ کړی، چې په جبري توګه د افغان کډوالو ایستل د ستونزو حللاره نه ده او حکومت دې د متقابل تفاهم او خبرو له لارې ستونزې حل کړي.
ښاغلي تره کي وویل: «موږ له څلورو لسیزو راهیسې په پاکستان کې ژوند کوو او دلته مو دوه نسلونه زیږیدلي دي.»
هغه زیاته کړه چې دغو کډوالو د پاکستان په پرمختګ کې مرسته کړې ده.
هغه له ۵۳ نادولتي موسسو څخه غوښتنه کړې، چې د پاکستان حکومت سره په مالي برخه کې مرسته وکړي، ترڅو د افغان کډوالو سره د سفر لګښت او خوراکي توکو په برابرولو کې همکاري وشي.
د یادولو وړ ده، چې د پاکستان حکومت له لوري د افغان کډوالو د ایستلو پروګرام په ډېرې چټکۍ روان دی او هره ورځ سلګونه افغانان د تورخم، سپین بولدک، غلام خان او نورو لارو څخه بېرته افغانستان ته ستنوي.
د ډان ورځپاڼې د راپور له مخې، په پاکستان کې د مېشتو افغان کډوالو د ټولنې مشر محمد تادین خان تره کي د دغه هېواد په فدرالي حکومت غږ کړی، چې په جبري توګه د افغان کډوالو ایستل د ستونزو حللاره نه ده، حکومت دې د متقابل تفاهم او خبرو له لارې ستونزې حل کړي.
ښاغلي تره کي وویل: «موږ له څلورو لسیزو راهیسې په پاکستان کې ژوند کوو او دلته مو دوه نسلونه زیږیدلي دي.» هغه زیاته کړه چې دغو کډوالو د پاکستان په پرمختګ کې مرسته کړې ده.
تره کي يادونه وکړه، چي د ټول پاکستان په ۷۲پنډغالو کې تر ۳،۵ ميليونه زيات افغان کډوال ژوند کوي، چې څو لسیزې یې د پاکستان خلکو ښه مېلمه پالنه کړې ده.
هغه له ۵۳ نادولتي موسسو څخه غوښتنه کړې، چې د پاکستان حکومت سره په مالي برخه کې مرسته وکړي، ترڅو د افغان کډوالو سره د سفر لګښت او خوراکي توکو په برابرولو کې همکاري وشي.
هغه دا هم ویلي، چې ډیری ستنېدونکي په افغانستان کې کور، دندې او د سوداګرۍ فرصتونه نه لري، چې دې چارې ستنېدونکي افغان کډوال له ډیرو ستونزو سره لاس او ګریوان دي.
د یادولو وړ ده، چې له پاکستان څخه د افغان کډوالو د ایستلو په دویم پړاو کې چې د اپریل په لومړۍ پیل شوی تردې مهاله ۱۶۲۴۲ افغان کډوال له پاکستان څخه ایستل شوي، چې ۹۴۳۹ تنه یې په خپله خوښه او ۶۸۰۳ تنه یې په زور ایستل شوي دي.
د ملګرو ملتونو د کډوالو ادارې (یو این اېچ سي ار) او (ای او ایم) د معلوماتو له مخې، د مارچ له لومړۍ نیټې د اپریل تر پنځمې پورې شاوخوا ۱۹۳۳۴ افغان کډوال د تورخم، غلام خان، سپین بولدک، بادیني او بهرامچې له لارو افغانستان ته ستانه شوي دي.
د پاکستان حکومت له لوري د افغان کډوالو د ایستلو پروګرام په ډیر چټکۍ روان دی او هره ورځ سلګونه افغانان بېرته افغانستان ته ستنوي.
د رویټرز خبري اژانس د راپور پر بنسټ، د مصر او قطر منځګړو حماس ته په غزه کې د اوربند د ټینګښت لپاره د اسراییل نوې طرحه وړاندې کړې، خو د دغې ډلې یو لوړپوړی چارواکی وايي چې د دې طرحې لږترلږه دوه برخې نهمني.
دغه اژانس د «سامي ابوزهري» په حواله د دوشنبې په ورځ (د اپرېل ۱۴مه) زیاته کړې، چې د اوربند هر ډول تړون باید په غزه کې جګړه پای ته ورسوي او له دې سیمې څخه اسراییل په بشپړ ډول ووځي.
په راپور کې راغلي، د اسراییل په طرحه کې څو پړاوونه چې پهکې اوربند، د بندیانو تبادله او د غزې بیارغونه شامل دي.
همداراز په بل پړاو کې د اسراییل لهخوا د حماس د بېوسلېکېدو غوښتنه هم شوې، خو د دغې ډلې سخت غبرګون یې راپارولی دی.
د ابوزهري په وینا، په دې وړاندیز کې اسراییل د لومړي ځل لپاره د مذاکراتو په راتلونکي پړاو کې د حماس د بېوسلېکېدو غوښتنه کړې، خو زیاتوي چې دا به حماس ته د منلو نه وي.
د دغې ډلې لوړپوړي چارواکی رویټرز ته وویل: «د مقاومت د وسلو تسلیمول یوه سره کرښه ده چې په مېلیونونو ځله ترې نهشي تېرېدلی. دا موضوع نه د ارزونې وړ ده او نه هم د بحث.»
اسراییل تر اوسه پورې د دې راپور په اړه غبرګون نه دی ښودلی، خو د مصر د استخباراتي ادارې مشر قاهرې ټلوېزیون ته ویلي: «حماس اوس د وخت پر ارزښت ښه پوهېږي او زه باور لرم چې د اسراییل دغه وړاندیز ته به یې ځواب چټک وي.»
د اسراییل او حماس ترمنځ د جګړې پای ته رسېدو لپاره دا څرګندونې وروسته له هغې کېږي، چې د تېرې اوونۍ په پای کې د سره صلیب نړۍوالې کمېټې مشرې ویلي و، چې په غزه کې بشري وضعیت په ډېرې چټکۍ سره ناوړه شوی او دا سیمه د ځمکې پر سر د انسانانو لپاره «دوزخ» ګرځېدلې ده.
د دغه بنسټ په وینا، که چېرې غزې ته بشري مرستې ونهرسېږي، د دغه سازمان سیمهییز روغتیايي مرکزونه به په راتلونکو دوو اوونیو کې د سرچینو له بشپړ کمښت سره مخ شي.
د یادونې ده، چې پر غزې د اسراییل د ځمکني او هوايي بریدونو په ترڅ کې تر دې دمه لږ تر لږه ۵۰ زره او ۸۸ کسان وژل شوي او ۱۱۵ زره ۸۷۵ نور ټپیان دي.