د بالیووډ نوموتي اداکار سلمان خان د مرګ یو بل ګواښ هم ترلاسه کړی. خو پولیس وايي، تورن کس غوښتل له دې لارې په انسټاګرام کې خپل څاروونکي زیات کړي. سلمان خان تر دې وړاندې د هوسیو د ښکار له امله هم په مرګ ګواښل شوی و.
د هندي رسنۍ ټایمز اف انډیا د راپور له مخې، پولیسو د دوشنبې په ورځ د میانک پانډیا په نوم یو کس په دې تور نیولی دی.د پوښتنو ګروېږنو پرمهال دغه کس په خپل ګواښ اعتراف وکړ او دا یې هم ومنله، چې هغه دا کار په خواله رسنیو کې د خپلو څاروونکو د زیاتولو لپاره کړی دی.۲۵ کلن میانک پانډیا وایي: «ما غوښتل، چې پر انسټاګرام پاڼې مې څاروونکي زیات شي او له همدې امله مې پلان لاره، چې د لارنس بشنوی ډلې لهخوا د مرګ ګواښونه تقلید کړم.»خو له بل پلوه د پي ټي ای خبري اژانس په خپل راپور کې ویلي، پولیسو میانک پانډیا چې د ګجرات د ودودرا اوسېدونکی دی؛ د هغه د رواني روغتیا له امله خوشې کړی دی.سلمان خان ته تر دې وړاندې هم د بشنوی ډلې لهخوا ګواښونه شوي وو او تېر کال په بانډرا کې د هغه په کور ډزې هم شوې وې.نوموړی له تېرو څو کلونو راهیسې د تورو هوسیو د ښکار په تور د مرګ له ګواښ سره مخ دی.د بشنویانو ټولنې لهخوا هوسۍ له مذهبي اړخه سپېڅلې ګڼل کېږي.په ۲۰۲۴ کال کې د ترلاسه شوي ګواښ له مخې، سلمان خان څخه غوښتل شوي و چې معبد «د هندوانو عبادت ځای» ته لاړ شي او له خلکو د هوسیو د ښکار له امله بښنه وغواړي او یا هم ۵۰ مېلیونه روپۍ تاوان ورکړي.د تېرې اکټوبر میاشتې په ۳۰مه نېټه هم سلمان خان ته د یو کس لهخوا ګواښ وشو او په بدل کې یې ترې د ۲۰ مېلیونه هندي کلدارو غوښتنه کړې وه.له دغو ګواښونو وروسته سلمان خان د وسلو لېږدولو او ساتلو جواز هم ترلاسه کړ.د راپورونو له مخې، له وروستي ګواښ راهیسې د سلمان خان امنیتي تدابیر لا سخت شوي دي.په دې وروستیو کې سلمان خان په ممبيي کې خبریالانو سره د خبرو پر مهال وویل:« زه به یوازې تر هغه وخته ژوندی پاتې شم، چې خدای غوښتي وي.»
