ایران او امریکا نن د ایټالیا پلازمېنه روم کې د خپلو اوږدمهالو اختلافاتو د حل لپاره دویم پړاو اټومي خبرې پیلوي. دا خبرې د ولسمشر ډونالډ ټرمپ د هغه ګواښ په سیوري کې دي، چې ویلې یې دي، که ډیپلوماسي ناکام شي، ښايي پوځي اقدام وکړي.
د ایران د بهرنیو چارو وزیر عباس عراقچي او د منځني ختیځ لپاره د ټرمپ استازی سټیو ویټکاف به دا خبرې د عماني منځګړو له لارې پنامخ یا په غیرمستقیم ډول وکړي.
یوه اونۍ مخکې هم دواړو لوریو په د عمان پلازمېنه مسقط کې لومړۍ دوره مذاکرات وکړل او هغه مذاکرات یې «مثبت» بللي و.
رویټرز په روم کې د امریکا او ایران ترمنځ د خبرو په اړه خپل راپور کې ویلي، تهران هڅه کوي چې د یوې ژر تر ژره هوکړې هیلي کمې کړي. خو یو شمېر ایراني چارواکي په دې باور دي چې پر دوی به بندیزونه ژر لرې شي.
بل خوا بیا د ایران مذهبي مشر ایت الله علي خامنه يي له امریکا سره د مذاکراتو په اړه ویلي:« نه ډیر هیلمن یم او نه هم ناهیلی.»
پر همدغه مهال ډونالډ ټرمپ د جمعې په ورځ خبریالانو ته ویلي:« زه ساده ډول غواړم چې ایران باید اټومي وسلې ترلاسه نه کړي. هغوی نشي کولی اټومي وسله ولري. زه غواړم ایران ستر، باثباته او بریالی وي.»
ټرمپ په ۲۰۱۸ کې د خپلې لومړۍ دورې پر مهال له ایران سره د ۲۰۱۵ کال اټومي تړون لغوه کړ او پر تهران یې سخت بندیزونه ولګول.
ټرمپ پهجنوري میاشت کې سپینې ماڼۍ ته په بیا ستنېدو سره پر ایران د خپلو سختو فشارونو کمپاین پیل کړی دی.
واشنګټن غواړي چې ایران باید د لوړې کچې یورانیمو غني کولو تولید ودروي، ځکه امریکا په دې باور ده، چې د ایران دا هڅه د اټومي وسلي جوړولو لپاره ده.
ایران بیا وايي، چې د دوی اټومي پروګرام یوازې سوله ییز اهداف لري، خو چمتو دی چې د بندیزونو د لرې کېدو په بدل کې یو شمېر محدودیتونه ومني، خو داسې قوي ضمانتونه غواړي، چې امریکا بیا د ۲۰۱۸ کال په څیر له تړون په شا نه شي.
د راپورونو له مخې، ایران له ۲۰۱۹ کال راهیسې له ۲۰۱۵ کال تړون سرغړونې پیل کړې او د سوله ییزې انرژۍ اړتیاوو له حد یې ډیر یورانیم غني کړي دي.
یو لوړپوړي ایراني چارواکي رویټرز ته د نوم نه ښودلو په شرط ویلي، چې ایران به هیڅکله د یورانیمو غني کول بند نه کړي او د ۲۰۱۵ کال تړون لاندې کچې ته د غني شویو یورانیمو زېرمه هم نه راټیټوي.
ایران د خپلو دفاعي وړتییاوو لکه توغندیو په اړه خبرو ته هم چمتو نه دي.
سره له دې چې تهران او واشنګټن اوس د ډیپلوماسۍ لاره خپله کړي ده، خو لا هم د دواړو هېوادونو ترمنځ ژور اختلاف شته.
سټیو ویټکاف او عباس عراقچي د تېرې اونۍ د خبرو په پای کې لنډه لیدنه درلوده، خو دواړو هېوادونو له ۲۰۱۵ کال راهیسې مستقمي خبرې نه دي کړې او ایران ویلي، چې د روم دا خبرې هم د عماني منځګړو له لارې غیر مستقیمي کیږي.
پر همدغه مهال روسیې چې د ۲۰۱۵ تړون غړې ده، وړاندیز کړی چي «چمتو ده مرسته وکړي، منځګړتوب او هر هغه رول لوبوي، چې د ایران او امریکا ترمنځ ګټور تمام شي.»
