د طالبانو د ریاست الوزرا اقتصادي مرستیال ملا عبدالغني برادر د کندهار په سپین بولدک ولسوالۍ کې له پاکستان څخه راستنو شویو کډوالو سره د لیدنې پرمهال ویلي، چې ازادي، غرور او رښتینې خوشحالي یوازې په خپله خاوره کې ده.
ملا عبدالغني برادر د چار شنبې په ورځ، د غويي پر لسمه، د کندهار په سپین بولدک ولسوالۍ کې له پاکستان څخه په جبري توګه بېرته راستنو شویو کډوالو سره د لیدنې پرمهال ویلي، چې د بل تر واک لاندې خاوره کې د مالکیت احساس، عزت او غرور نشته.
نوموړی وايي، د مالکیت احساس او خوشحالې یوازې په خپله خاوره کې ده.
هغه زیاته کړې، «موږ پوهېږو چې تاسې په جبري او ناڅاپي توګه د خپلو کورونو پرېښودلو ته اړ شوي یاست، کاروبارونه مو خراب شوي، ډېر وسایل او امکانات مو پاتې شوي، تعلیم او زده کړې مو نیمګړي پاتې شول. روښانه ده چې دا سخت حالت دی.»
دغه طالب چارواکی وايي، چې د راستنو شویو افغانانو لپاره به د کار کولو زمینه او د هغوی ماشومانو ته به د زده کړو اسانتیاوې برابرې کړي. برادر وايي، « ستاسې د ستونزو د حل لپاره به له ټولو امکاناتو استفاده وکړو. ماشومان به مو مدارسو او ښوونځیو ته ځي، کاروبارونه به مو جوړېږي او ټولې ممکنه اسانتیاوې به درته برابرېږي.»
نوموړي پر همدغه مهال پر نړیوالو مرستندویه موسسو غږ کړی، چې د راستنېدونکو افغانانو لاسنیوی وکړي.
له پاکستان څخه په جبري توګه د افغان کډوالو د بېرته ستنولو لړۍ په ۲۰۲۳ کال کې پیل شوې او طالبان وايي، تردې مهاله شاوخوا شپږ سوه زره افغانان بېرته افغانستان ته راستانه شوي او دا لړۍ لا هم دوام لري.
