طالبانو په تخار او دایکنډي کې د دوو ښځو په ګډون پنځه کسان په دورو وهلي دي
د طالبانو سترې محکمې خبر ورکړی، چې په تخار او دایکندي ولایتونو کې یې د دوو ښځو په ګډون پنځه کسان په دورو وهلي دي. دغې محکمې په خپره کړې خبرپاڼه کې ویلي، چې د تخار ولایت په ینګي قلعه ولسوالۍ کې یې د یوې ښځې په ګډون دوو مجرمینو او یو تورن کس ته سزا ورکړې ده.
په خبرپاڼه کې راغلي، چې په دغه ولایت کې یې د یوې ښځې په ګډون دوو کسانو ته «د نامشروع اړیکو» او یو کس ته د غلا په تور سزاوې ورکړې دي.
خبرپاڼه زیاتوي، چې دوو مجرمو کسانو ته یې د ۳۹ـ ۳۹ درو او دوه کلن تنفیذي بند سزا او بل تورن کس ته یې د ۳۹ درو سزا ورکړې ده.
د دغې محکمې په یوې بلې جلا خبرپاڼه کې بیا راغلي، چې طالبانو په دایکنډي ولایت کې د یوې ښځې په ګډون دوو کسانو ته د «زنا» په تور په عام محضر کې سزا ورکړې ده.
د خبرپاڼې له مخې؛ محکمې تورنو کسانو ته د ۳۹-۳۹ درو سزا ورکړې ده.