د روسیې د بهرنیو چارو وزارت د چهارشنبې په ورځ وویل، چې د سوریې د نوي حکومت د بهرنیو چارو وزیر به سبا مسکو ته سفر وکړي. دا به په سوریه کې د بشارالاسد په مشرۍ د دولت له رانسکورېدو او په دغه هېواد کې د نوي حکومت له جوړېدو وروسته روسیې ته د یوه لوړپوړي چارواکي لومړنی سفر وي.
د روسیې د بهرنیو چارو وزارت ویاندې ماریا زاخارووا د دغه هېواد ټاس دولتي خبري اژانس ته ویلي، سرګي لاوروف به د پنجشنبې په ورځ په مسکو کې د خپل سوري سیال اسعد الشېباني کوربه وي. دواړه لوري به له دوه اړخیزو اړیکو سربېره د سیمې او نړۍوالو مسایلو په تړاو هم خبرې وکړي.
د سوریې دولت لا تر اوسه مسکو ته د دغه هېواد د بهرنیو چارو وزیر د سفر په تړاو څه نه دي ویلی.
د سوریې پخوانی ولسمشر بشارالاسد د روسیې یو له پخوانیو متحدینو وو او یوه لسیزه مخکې له هغه د مسکو نظامي ملاتړ د سوریې د کورنۍ جګړې مسیر بدل کړ او ورسره د څو نورو کلونو لپاره بشارالاسد خپلې واکمنۍ ته دوام ورکړ، خو کله چې پروسږکال یوې وسله والې ډلې د اسد پر ضد خپل یرغلیز بریدونه پیل کړل، نو روسیې پر واک د اسد د پاتې کېدو لپاره څه کار ونه کړ خو د بشارالاسد د حکومت له رانسکورېدو وروسته روسیې هغه او کورنۍ ته یې پناه ورکړه او اوس هم بشارالاسد له خپلې کورنۍ سره په دغه هېواد کې ژوند کوي.
په دمشق کې د احمد الشرع په مشرۍ لنډمهالي دولت له مسکو سره په اړیکو کې عملي تګلاره غوره کړې ده.
د ۱۴۰۳ کال په سلواغې میاشت کې یوه روسي پلاوي دمشق ته سفر وکړ او یوه میاشت وروسته بیا د روسیې ولسمشر ولادیمیر پوتین له احمد الشرع سره ټيلفوني خبرې وکړې او کرملین بیا په هغه وخت کې یادې خبرې کاري او رغوونکې بللې وې.
لا هم د سوریې په سواحلو کې یو شمېر روسي ځواکونه پاتې دي او د راپورونو له مخې روسیې خپل نفتي محمولې سوریې ته لېږدولي دي.
د روانې زېږیزې میاشتې په لومړیو کې د سوریې د دولتي ځواکونو او دروزي مذهبي لږکیو له وسله والې نښتې سره هم مهاله اسراییل نظامي مداخلې وکړه او روسیې بیا د اسراییل یاده مداخله رد کړه، د سوریې د لنډ مهالي دولت رييس احمد الشرع بیا د مسکو له یاد دریځه په ښکاره مننه وکړه.
