د عربي اماراتو د بهرنیو چارو وزیر شېخ عبدالله بن زاید ال نهیان له خپل ایراني سیال عباس عراقچي سره په ټلیفوني خبرو کې د سیمې پر روان وضعیت، دوه اړخیزو اړیکو او همداراز د ګډو همکاریو پر پراخولو خبرې کړي دي.
دواړو خواوو ټینګار کړی، چې د سیمهییزو ستونزو د حل لپاره باید سیاسي لارو چارو ته لومړیتوب ورکړل شي.
د ایران د بهرنیو چارو وزارت د یوې خبرپاڼې په خپرولو سره ویلي، چې دواړو لوریو د سیاسي، اقتصادي او سوداګریزو برخو په ګډون په بېلابېلو برخو کې دوهاړخیزې اړیکې ارزولي او ټینګار یې کړی، چې دواړه هېوادونه باید له ټولو موجودو او احتمالي ظرفیتونو ګټه واخلي.
