د اسټرالیا حکومت له اسرايیل غوښتي، چې د ټولې غزې د نیولو پرېکړه دې بېرته واخلي. د اسټرالیا حکومت دا خبره داسې مهال کوي، چې د اسراييل کابینې د ټولې غزې د نیولو طرحه منظور کړې ده.
د اسټرالیا د بهرنیو چارو وزیرې پني وونګ خبرداری ورکړی، چې د اسراييل وروستۍ پرېکړه په غزه کې بشري ناورین نور هم ډېروي او دا کار د نړۍوالو قوانینو تر پښو لاندې کول دي.
اسټرالیا یو وار بیا غوښتنه کړې، چې د اسراييل او حماس تر منځ دې اوربند وشي او په غزه کې دې له خنډ او ځنډ پرته خلکو ته بشري مرستې ورسول شي او دارنګه حماس دې هم اسراييلي زندانیان خوشې کړي.
