په غزه کې د فلسطیني مشهور فوټبالر سلیمان العبید له وژل کېدو وروسته، د ملګرو ملتونو د بشري حقونو ځانګړي راپور ورکوونکي د یکشنبې په ورځ له یوفا غوښتنه وکړه، چې اسراییل دې «د جنګي او د بشریت ضد د جنایتونو» د ترسره کولو له امله له ټولو سیالیو وباسي.
فرانچسکا البانیز په خپل اېکس کې لیکلي: «راځئ چې ورزش له اپارټایډ او نسل وژنې پاک کړو. یو توپ، په هر وار کې یو ګوزار.»
د البانیز دا غوښتنه د پخواني فلسطیني لوبغاړي سلیمان العبید د وژل کېدو پر وړاندې له غبرګون وروسته مطرح شوه.
د فلسطین د فوټبال فدراسیون په وینا، العبید د چهارشنبې په ورځ هغه مهال ووژل شو، چې د اسراییل پوځ د غزې په سوېلي برخه کې د مرستې د وېش یوې نږدې سیمې ته د مرستو د ترلاسه کولو په تمه ولاړو ملکي وګړو باندې ډزې وکړې.
۴۱ کلن العبید چې د غزې اوسېدونکی او د پنځو ماشومانو پلار و، د فلسطین د فوټبال د تاریخ له غوره لوبغاړو څخه ګڼل کېده.
