د طالبانو د امربالمعروف او نهې عن المنکر وزارت وايي، یو ماهر جادوګر چې په دې وروستیو کې له ایرانه راغلی وو په بلخ ولایت کې یې نیولی دی. د دغه وزارت په وینا، یاد شخص د ساحري فعالیتونو لپاره افغانستان ته راغلی، خو دا یې نه ده روښانه کړې چې دغه نیول شوی جادوګر افغان که ایرانی دی.
د طالبانو د امربالمعروف او نهې عن المنکر وزارت د یوې خبرپاڼې په خپرولو سره زیاته کړې، دغه جادوګر چې د خپلو جادو ګريزو فعالیتونو د دوام لپاره تېره اونۍ افغانستان ته راغلی وو، د بلخ ولایت د مرکز لسمې امنیتي حوزې په شاوخوا سیمو کې نیول شوی دی.
دغه وزارت، جادو یوه حرامه او کبیره ګناه بللې او په وینا یې له دغه جادوګر څخه چې د هویت په اړه یې بشپړ معلومات نه دي ورکړل شوي یو شمېر د جادو کولو کتابونه او وسایل ترلاسه شوي او لا هم تر پوښتنو او ګروېږنو لاندې دی.
