د غزې د روغتیا وزارت راپور ورکړی، په تېرو ۲۴ ساعتونو کې لږ تر لږه ۵۷ فلسطینیان وژل شوي، چې له دې جملې څخه ۳۸ تنه د خوړو د ترلاسه کولو پر مهال د اسراییلي ځواکونو د ډزو او بریدونو له امله وژل شوي دي.
د ناصر طبي کمپلکس د راپور له مخې، له دغو کسانو څخه ۲۱ تنه هغه مهال ووژل شول، کله چې یې د غزې په سوېل کې د خوړو د ترلاسه کولو هڅه کوله.
دا په داسې حال کې ده، چې د فلسطین خبري اژانس راپور ورکړی چې په تېرو ۲۴ ساعتونو کې ۳ نوي زېږېدلي ماشومان بیا د لوږې له امله مړه شوي دي. د ورکړل شويو شمېرو پر بنسټ، تر اوسه ۲۵۱ کسان چې پکې ۱۰۸ ماشومان هم شامل دي، د لوږې له امله مړه شوي دي.
د غزې د روغتیا وزارت اعلان کړی، تر هغه وروسته چې د امریکا او اسراییل په مشرۍ د مرستو مرکزونه جوړ شوي، تر اوسه ۱,۹۲۴ تنه وژل شوي او له ۱۴,۲۸۸ ډېر نور ټپیان شوي دي. ملګرو ملتونو دغه مرستندوی مرکزونه «د مرګ جالونه» بللي دي.
