د طالبانو د کډوالو ستونزو ته د رسېدو کمیسیون وايي، چې پرون (جمعه، زمري ۳۱مه) له ایران او پاکستان نه یو زرو او ۶۹۳ افغان کډوالې کورنۍ هېواد ته ستنې شوې دي. د دې کورنیو د غړو شمېر ۶ زره او ۲۰۲ ښودل شوی دی.
د طالبانو مرستیال ویاند حمدالله فطرت نن (شنبه، وږي لومړۍ نېټه) په اېکس پاڼه کې د کډوالو ستونزو ته د رسېدو د کمېسیون د ورځني راپور په شریکولو سره ویلي چې دغه کډوال د هرات د اسلام کلا، د کندهار سپين بولدک، د نیمروز ورېښمو لارې او د ننګرهار د تورخم له لارې هېواد ته ستانه شوي دي.
طالبانو ویلي، چې ستانه شویو کډوالو ته یې مالي، ترانسپورټي، خوراکي او د روغیتا په برخه کې خدمات وړاندې کړي.
د طالبانو د کډوالو ستونزو ته د رسېدو کمیسیون همداراز ویلي چې په همدې ورځ یې له کابل څخه ۳۳۵ کورنۍ چې د غړو شمېر یو زرو او ۷۰۰ کسان کېږي، شمالي ولایتونو ته لېږدولي دي.
په ورستیو کې پاکستان او ایران په ځانګړي ډول د افغان کډوالو د ستنولو لړۍ په کمساري ډول چټکه کړې ده.
