د پيټياېم غړی حنیف پښتین وايي پښتونخوا کې باید د پوځ د عملیاتو مخه ونیول شي
د پښتون ژغورنې غورځنګ (پيټياېم) مخګښ غړی حنیف پښتین وايي چې د پاکستان پوځ د خپلو شخصو ګټو لپاره په پښتونخوا کې جګړه ګرمه ساتلې ده.
د پښتون ژغورنې غورځنګ (پيټياېم) مخګښ غړی حنیف پښتین وايي چې د پاکستان پوځ د خپلو شخصو ګټو لپاره په پښتونخوا کې جګړه ګرمه ساتلې ده.
نوموړي په یوه لنډ ویډیويي پیغام کې زیاته کړې، د پښتونخوا او وزیریستان ټول ولسونه باید د پوځ د عملیاتو مخه ونیسي او اجازه ور نهکړي چې دوی د ترهګرې د ځپلو په پلمه خلکو ته ستونزې جوړې کړي.
پښتین وايي: «که نن د پښتونخوا په یوې سیمې جنګ دی نو هرو مرو د جګړې لمن نورو سیمو ته هم غځیږي نو پکار ده چې ولسونه وار دمخه په دې اړه ګامونه پورته کړي.»
د پښتون ژغورنې یاد مخکښ غړي که څه هم په دې اړه څه نه دي ویلي چې خلک باید له کومو لارو چې په پښتونخوا کې د جګړې او په ځانګړي توګه د پوځ د چاڼړیزو عملیاتو مخه ونیسي، خو خبرداری ورکړی چې که سملاسي ګامونه پورته نهشي، نو حالات به نور ګډوډ شي.
دې سره جوخت همدا نن د ملي ډېموکراتیک ګوند مشر محسن داوړ هم ویلي چې په پښتونخوا کې د ترهګرۍ د ځپلو تش په نامه عملیاتو کې ترهګرې زیاته شوې ده.
دا په داسې حال کې ده چې په وروستیو کې د پښتونخوا په باجوړ ولسوالۍ کې د پاکستاني ځواکونو له لوري چاڼړیز عملیات پیل شوي چې له کبله زرګونه کورنۍ بې ځایه شوي او د ځینو کسانو د مرګ ژوبلېپه اړه خبرونه خپاره شوي دي.
