طالبان وايي هلمند کې یې له ۳۶۰ سوالګرو کورنیو سره نغدي مرسته وکړه

طالبان وايي، په هلمند کې یې ۳۶۰ اړمنو، سوالګرو او بې‌کوره کورنیو ته نغدي مرسته ورکړې ده. دغه مرسته د یادې ډلې د کورنیو چارو وزارت د مخدره توکو پر وړاندې د مبارزې معینیت ‌له‌خوا د دغه ولایت د مخدره توکو پر وړاندې د مبارزې ریاست په همکارۍ وېشل شوې ده.

د طالبانو په وینا؛ دغه کورنۍ مخکې له مخکې د یوې ځانګړې کمېټې له‌خوا ارزول شوې او د مستحقو په توګه پېژندل شوې وې. ویل کېږي هرې کورنۍ ته ۳زره افغانۍ نغدي مرسته ورکړل شوې ده.
طالبان داسې مهال خلکو ته د مرستې وېش ادعا کوي، چې پر افغانستان د دغې ډلې تر واکمنېدو وروسته د هېوادوالو اقتصادي وضعیت خورا کړکېچن شوی دی.