د طالبانو امنيتي او تصفيوي کمېسيون د زلزلهځپلو د مرستو په تړاو غونډه وکړه
د طالبانو د امنیتي او تصفیوي چارو مرکزي کمېسیون د مولوي محمد یعقوب مجاهد په مشرۍ په ختیځ کې د وروستۍ زلزلې له امله د زیانمنو شویو د مرستو په اړه غونډه کړې ده.
د طالبانو د امنیتي او تصفیوي چارو مرکزي کمېسیون د مولوي محمد یعقوب مجاهد په مشرۍ په ختیځ کې د وروستۍ زلزلې له امله د زیانمنو شویو د مرستو په اړه غونډه کړې ده.
یاد کمېسیون په یوې خپره کړې خبرپاڼه کې ویلي، چې د غونډې ګډونوالو د ختيځ زون په ولايتونو کې د وروستۍ زلزلې له امله د رامنځته شويو ځاني او مالي زيانونو په اړه خپله ژوره خواشیني څرګنده کړې.
د خبرپاڼې له مخې، د طالبانو دفاع وزیر محمد یعقوب مجاهد ویلي: «د زلزله ځپلو درد او غم د ټول ولس ګډ غم دی، امنيتي ځواکونه به د خلکو تر څنګ تر هغه وخته پاتې شي، څو د لومړنيو اړتياوو د پوره کولو لپاره لازم اقدامات ترسره نه شي.»
په خبرپاڼه کې راغلي، چې اړونده ادارو ته جدي لارښوونې وشوې، ترڅو د بېړنيو مرستو د رسولو بهير چټک کړي او د زلزلهځپلو د ژوند د عادي کېدو لپاره هر اړخيز عملي ګامونه پورته کړي.
ویل کېږي، چې د غونډې په پاې کې ټینګار شوی چې د طالبانو د دفاع او کورنيو چارو وزارتونو په ګډون ټول امنيتي او ملکي ارګانونه دې د ولس خدمت د لومړيتوب په توګه په ګډه او بشپړه همغږۍ خپلو هڅو ته دوام ورکړي.
