د طالبانو د مشر ملا هبت الله په امر د کندهار په ګډون په یو شمېر ولایتونو کې د نوري فایبر انټرنېټي خدماتو محدودېدو په غبرګون کې د کابل پوهنتون پخواني استاد محمد اسماعیل یون ویلي، دا یوازې تخنیکي محدودیت نه دی، بلکې د خلکو پر تعلیم، اقتصاد او د بیان پر ازادۍ یو مستقیم برید دی.
یون پر خواله رسنۍ اېکس لیکلي دي: «د فایبر انټرنېټ بندول یوازې تخنیکي محدودیت نه دی، بلکې دا د خلکو پر تعلیم، اقتصاد او د بیان پر ازادۍ مستقیم برید دی.»
اسماعیل یون همداراز زیاتوي: «انټرنېټ د ژوند یوه اساسي اړتیا ده، دا ړتیا له خلکو په زور مه اخلئ! هیله ده مسوولین د خلکو ستونزې درک کړي، نه دا چې غږ یې چوپ کړي.»
هغه وایي، د نوري فایبر خدماتو محدودول په ځانګړې توګه د هغو محصلینو، استادانو، سوداګرو او رسنیو پر کار اغېز کوي، چې د انټرنېټ له لارې د زدهکړې، سوداګرۍ او معلوماتو تبادلې ته اړتیا لري.
د پوهانو په باور، دا پرېکړه به نه یوازې د خلکو د ورځني ژوند پر کیفیت ناوړه اغېزې ولري، بلکې د افغانستان د نړۍوال انځور د لا خرابېدو لامل به هم شي.
