طالبانو په بادغیس کې یو کس په عام محضر کې اعدام کړ

یادې محکمې د پنجشنبې په ورځ، د تلې ۲۴مه ویلي، چې د بادغیس ولایت د جوند ولسوالۍ اوسیدونکي اسماعیل باندې د وسلې په وسیله د دوو کسانو د وژلو تور و، چې د محکمو د دریو مرحلو له لارې نوموړی مجرم وپيژندل شو او د “قصاص” حکم ورکړل شوی و.

د طالبانو سترې محکمې ویلي، چې پر اسماعیل یې نن د بادغیس په ورزشي لوبغالي کې د عامو خلکو د سترګو په وړاندې د “قصاص”حکم عملي کړ.

طالبانو ویلي، چې پر اسماعیل د “قصاص” حکم د دې ډلې د مشر هبت الله اخوندزاده تر تایید وروسته عملي شوی دی.

طالبانو تردې وړاندې هم په بادغیس، فراه او نیمروز ولایتونو کې پر څلورو کسانو د “قصاص” حکمونه عملي کړي وو.

د طالبانو له خوا دا ډول سزاګانې تل د بشري حقونو د نړیوالو سازمانو له سخت غبرګون سره مخ شوې دي.