په کابل کې د ایران سفارت فرهنګي سلاکار سید روح الله حسیني د یوه پیغام په خپرولو سره د افغانستان په شمال کې د وروستۍ ویجاړونکې زلزلې له کبله خواخوږي ښودلې ده. نوموړي ویلي، چې د زلزلې له کبله د خلکو د ځاني او مالي زیانونو سربېره د مزار شریف روضې ځینې برخې هم زیانمنې شوې دي.
سید روح الله حسیني ویلي:« د مزارشریف روضه د دواړو ملتونو د ژورو تاریخي او مذهبي اړیکو نښه ده. ایران چمتو دی، چې د اړوندو ځایي ادارو په همغږۍ د روضې د زیانمنو شویو برخو د بیارغونې چارې ترسره کړي.»
دا په داسې حال کې ده، چې په مزار شریف ښار کې د روضې ځینې برخې وار لهمخه د ویجاړۍ له ګواښ سره مخامخ وې؛ خو د طالبانو حکومت ویلي و، چې د بیارغونې لپاره ځینې برنامې تر لاس لاندې لري.
د طالبانو د عامې روغتیا وزارت خبر ورکړی، چې په سمنګان او بلخ ولایتونو کې د تېرې شپې د زلزلې له امله د مړو شمېر له ۲۷ کسانو هم ډېر دی او له ۷۰۰ ډېر نور ټپیان دي. طالبانو ویلي، د ژغورنې ډلې زلزلهځپلو سیمو ته رسېدلې او ټپیان یې هم روغتونونو ته لېږدولي دي.
