سرچینو افغانستان انټرنشنل - پښتو ته تایید کړه، چې د طالبانو یو پلاوی سعودي عربستان ته د پاکستاني چارواکو سره د خبرو اترو لپاره تللی دی. د ترلاسه شویو معلوماتو له مخې، د دواړو پلاوو ترمنځ ترسره شوي مزاکرات یو ځل بیا ناکام شوي او کومه مطلوبه پایله یې نده ورکړې.
د طالبانو په بهرنیو چارو وزارت کې سرچینو نن شنبه، د لیندۍ ۱۰مه وویل، چې د طالبانو په پلاوي کې ددې ډلې د کورنیو چارو وزارت مرستیال رحمت الله نجیب، د بهرنیو چارو وزارت ویاند عبدالقهار بلخي او د طالبانو د ادارې یو بل لوړپوړی غړی انس حقاني شامل وو.
سعودي عربستان مخکې د طالبانو او پاکستان ترمنځ د منځګړیتوب لپاره خپل چمتووالی اعلان کړی و.
طالبانو تر اوسه په سعودي عربستان کې د خبرو اترو په اړه څه نه دي ویلي.
دا مذکراتو په سعودي عربستان کې وروسته له هغه وشول، چې په استانبول کې د دواړو خواوو ترمنځ دوهم او دریم د خبرو اترو پړاونو کومې پایلې نه درلودې.
قطر او ترکیې د منځګړو په توګه د طالبانو او پاکستان ترمنځ د خبرو اترو د دریو پړاوونه کوربه توب وکړ.
د خبرو اترو لومړی پړاو چې په دوحه کې ترسره شو او دواړو خواوو په سمدستي اوربند هوکړه وکړه.
له دې وړاندې د طالبانو ویاند ذبیح الله مجاهد د استانبول د خبرو اترو ناکامي تایید کړه. هغه د لړم ۱۷مه په اېکس خواله رسنۍ ولیکل چې په استانبول کې له پاکستان سره خبرې اترې هیڅ پایلې نه درلودې.
ذبیح الله مجاهد ویلي وو، چې د پاکستان په استخباراتو او پوځ کې ځینې کړۍ کار سبوتاژ کوي او هڅه کوي چې اړیکې د پلمو په جوړولو سره خرابې کړي.
