طالبانو په غزني او بلخ کې دوه کسان په دُرو ووهل

طالبانو په عام محضر کې پر دُرو د «تورنو» کسانو د وهلو په لړ کې د دوشنبې په ورځ (د لیندۍ ۱۰مه) د غزني په ګېلان ولسوالۍ کې یو کس د غلا په تور په عام محضر کې په ۳۹ دُرو وواهه او پر یونیم کال تنفیذي بند هم محکوم کړ.

د طالبانو سترې محکمې د یوې خبرپاڼې په خپرولو سره زیاته کړې، یو بل کس یې بیا په بلخ ولایت کې د الکولي مشروباتو د قاچاق په تور په ۳۹ دُرو وهلی دی.

د خبرپاڼې له‌مخې، یادې پرېکړې د سترې محکمې له تاییدۍ وروسته عملي شوي دي.
طالبانو په تېرو درېیو میاشتو کې څه باندې ۳۳۰ کسان په دُرو وهلي دي | افغانستان انټرنشنل پښتو

د افغانستان انټرنشنل- پښتو د موندنو له‌مخې، طالبانو په تېرو درېیو (اګسټ، سپټمبر او اکټوبر) میاشتو کې د هېواد په ۲۱ ولایتونو کې ۳۳۱ کسان د «نامشروع اړیکو، له کورونو د تېښتې، بد اخلاقۍ، زنا، لواطت، غلا، رشوت، د شرابو په ګډون د نشه يي توکو کاروبار، جعل او فرېبکارۍ» په تورونو د خلکو په مخ کې لسګونه دُرې وهلي او یو شمېر یې پر څو کاله تنفیذي بندونو هم محکوم کړي دي.