طالبانو په بدخشان کې پر چینایي وګړو د برید په تړاو د دوو کسانو د نیولو خبر ورکړ
په بدخشان کې د طالبانو د امنیه قومندانۍ ویاند احسانالله کامګار وايي، چې د دې ډلې امنیتي ځواکونو پر چینایي وګړو د ډلهییز برید په تور دوه کسان نیولي دي.
په بدخشان کې د طالبانو د امنیه قومندانۍ ویاند احسانالله کامګار وايي، چې د دې ډلې امنیتي ځواکونو پر چینایي وګړو د ډلهییز برید په تور دوه کسان نیولي دي.
د طالبانو تر کنټرول لاندې حریت راډیو د راپور له مخې، کامګار څرګنده کړې چې دغه کسان نن دوشنبه د مایمي ولسوالۍ په مربوطاتو کې نیول شوي او اوسمهال له دوی څخه څېړنې روانې دي.
دغه کسان په داسې حال کې نیول کېږي، چې د بدخشان ځايي سرچینو افغانستان انټرنشنل ته ویلي، چې د یکشنبې په ماښام (د لیندۍ ۹مه) د بدخشان ولایت د مایمي ولسوالۍ د رضوي کلي د تاجکستان شادک مرزي سیمه کې پر دوو چینايي وګړو برید شوی دی.
سرچینې وايي، یادو دوو چینايي وګړو د دې سیمې د سړک جوړولو په پروژو کې کار کاوه او پرې د سپکو وسلو ډزې شوې دي.
د سیمې امنیتي چارواکو ویلي، چې د پېښې اصلي علت او د برید چلند به د څېړنو له بشپړېدو وروسته معلوم شي.
تر دې مخکې د چهارشنبې په ورځ هم د تاجکستان د ختلان ولایت په یوه سیمه کې درې چینايي وګړي د افغانستان له خاورې د ډرون په برید کې وژل شوي وو.
د تاجکستان د بهرنیو چارو وزارت د پنجشنبې په ورځ ویلي و، چې د افغانستان له خاورې څخه د ختلان ولایت د سرحدي سیمې په شاوخوا کې د «شاهین اېساېم» د سرو زرو د استخراج شرکت پر کاري ځای برید شوی، چې په پایله کې یې درې چینايي کارکوونکي وژل شوي دي.
د طالبانو د بهرنیو چارو وزارت د جمعې په ورځ د تاجکستان پر پوله د چینايي وګړو وژل کېدل غندلي. یاد وزارت ویلي، چې د ابتدایي ارزونو او د طالبانو د اړوندو ادارو د معلوماتو له مخې، دا پېښه د هغو ډلو کار دی چې د سیمې د هېوادونو ترمنځ د ګډوډۍ، بې ثباتۍ او بې باورۍ د رامنځته کېدو هڅې کوي.
