پاکستان د طالبانو د محاصرې او ملامته کولو لپاره څو اړخیزې هڅې پیل کړې دي. دا هڅې په امریکا کې د افغانانو پر ویزو د ټرمپ له بندیز او په تاجکستان کې د چینایانو تر وژلو وروسته چټکې شوې دي. ایکانومیک ټایمز وايي، د اسلام اباد لوړپوړي وزیران طالبانو ته ډاګیز ګواښونه کوي.
د امریکا ولسمشر ډونالډ ټرمپ تیره اونۍ اعلان وکړ، چې د افغانستان په ګډون د څو هیوادونو د وګړو د پناه غوښتنې پروسه به "د اوږدې مودې لپاره" وځنډول شي؛ دا پریکړه وروسته له هغه وشوه چې یو افغان وګړی په واشنګټن کې د امریکا د ملي ګارډ پر سرتیرو ډزې وکړې.
سرچینو د سې شنبې په ورځ ایکانومیک ټایمز ته وویل چې اسلام اباد کابل د ترهګریزو بریدونو په تور ملامت کړی دی.
سربیره پردې، د تاجکستان په پوله کې د افغانستان له خاورې له دوو مرګونو بریدونو وروسته، پاکستان سملاسي پر طالبانو تور ولګاوه او هڅه یې وکړه چې د کابل او دوشنبې ترمنځ درز رامینځته کړي.
تیره اونۍ، د پاکستان پوځ ادعا وکړه، چې افغان طالبانو د ترهګرو تګ او راتګ او په پاکستان کې د بریدونو ترسره کولو لپاره اسانتیاوې برابرې کړې دي.
د پاکستان او افغانستان ترمنځ اړیکې د اسلام اباد له پرله پسې تورونو وروسته چې افغان طالبان د تحریک طالبان پاکستان ملاتړ کوي، ترینګلې شوې دي.
سربیره پردې ایکانومیک ټایمز لیکلي، چې د افغان کډوالو ډله ییز اخراج پر طالبانو د فشار راوستلو یو بل څو اړخیز چلند دی.
د احصایو له مخې، له ۲۰۲۳ کال راهیسې شاوخوا ۱،۵ میلیون افغان کډوال له پاکستان څخه اېستل شوي دي.
له پاکستان څخه د افغان کډوالو ایستل دوام لري، او هره ورځ د زرګونو خلکو د جبري ایستلو راپورونه ورکول کیږي.
