د طالبانو د کورنیو چارو وزارت د عامه اړیکو رییس عبدالحکیم همت اخوندزاده د ولایتونو د امنیه قوماندانیو ویاندویانو ته ویلي، چې په کمو امکاناتو ته به ډېر کار کوي او ددې ډلې کړنې به منعکسوي. په ورته مهال د یاد وزارت ویاند وايي، چې نن سبا عصر کې تبلیغاتي جګړه روانه ده.
د طالبانو د کورنیو چارو وزارت نن سې شنبه، د لیندۍ ۱۱مه وویل، چې د هېواد د ۳۴ ولایتونو د والیانو، امنیه قوماندانیو ویاندویانو له مطبوعاتي مسوولینو سره یو ویډیویي کنفرانس کې عبدالحکیم همت اخوندزاده ویاندویانو ته لارښوونې وکړې او او ټینګار یې وکړ، چې خپل مطبوعاتي مسوولیتونه دې په موثر، منظم او مسلکي ډول تر سره کړي.
د طالبانو د کورنیو چارو وزارت ویاند عبدالمتین قانع وویل، چې ویاندویان دې ددې ډلې د پالیسۍ له مخې د خدماتو رسونې، ولسي او عامه اړیکو پیاوړي کولو، له رسنیو سره موثر تعامل، اطلاعاتو ته د لاسرسي اسانتیا او د لاسته راوړنو انعکاس ته ځانګړې پاملرنه وکړي.
دا څرګندونې په داسې حال کې کېږي، چې طالبانو له راتګ سره دې ډلې په هېواد کې رسنۍ سانسور کړې دي.
