د طالبانو د امربالمعروف وزارت ویاند سېفاسلام خېبر وايي، دغې ډلې په کندهار کې د طب پوهنځي یو محصل هغه مهال نیولی، چې پر خپله فېسبوک پاڼه یې په خوست کې د اعدام شوي کس د حکم پر تطبیق مخالفت څرګند کړی و. طالبانو د دغه محصل د بښنې غږ هم خپور کړی دی.
د احمدالله په نوم دغه محصل په اصل کې د غزني اوسېدونکی دی او په کندهار کې د یوه خصوصي پوهنتون زدهکړیال دی.
د امربالمعروف محستبانو نوموړی تېره ورځ له دې امله نیولی، چې د دوی په خبره یې د شریعت ضد څرګندونې کړې وې.
د طالبانو د یاد وزارت ویاند د ټولنیزو رسنیو کارونکو ته خبرداری ورکړی، چې «د اسلامي احکامو او مقدساتو» پر وړاندې له نقد او نیوکو لاس واخلي.
هغه د نیول شوي محصل په اړه ویلي: «احمدالله پر خپلې فېسبوک پاڼې د الهي حکم د مخالفت او د ناسمو الفاظو په کارولو سره احضار شوی او له ورته لیکنو منع شوی دی. هغه په خوست کې پر یوه قاتل د الهي حکم د پلي کولو سره مخالفت ښودلی او دا یې ناسم ګڼلی و.»
دا په داسې حال کې ده، چې طالبانو د خپلې واکمنۍ په څه باندې څلورو کلونو کې د دغې ډلې د انتقادکوونکو په ګډون زرګونه هېوادوال نیولي او یو شمېر یې د ټوپک په زور جبري اعتراف ته هم اړ کړي دي.
په نیول شویو کسانو کې تر ۱۰ څخه ډېر خبریالان هم شامل دي.
