د پاکستان د بهرنیو چارو وزارت ویاند وايي، چې تر هغه به له افغانستان سره سوداګري تړلې پاتې وي ترڅو چې طالبان د افغانستان خاوره د پاکستان پر ضد د کارېدو مخنوی وکړي. طاهر انداربي زیاتوي، چې دوی پرېکړه کړې، چې یوازې د بشري مرستو لپاره لارې پرانیزي.
د پاکستان بهرنیو چار وزارت ویاند طاهر انداربي نن جمعه، د لیندۍ ۱۴مه په اسلام اباد کې یوې خبري ناستې ته وویل، چې دغه هېواد د افغانستان د خلکو لپاره مثبت دی نو ځکه د بشري مرستو لپاره پوله پرانیزي.
طاهر انداربي په خپلو څرګندونو کې وویل:« له افغانستان سره سرحدي لارې به د دوه اړخیزې سوداګرۍ لپاره تړلې وي تر هغه چې طالبان د پاکستان پر وړاندې د افغان خاورې د کارېدو مخنوی وکړي.»
د پاکستان د بهرنیو چارو وزارت په دې خبري ناسته کې په سعودي عربستان کې ددې هېواد په منځګویتوب د طالبانو او پاکستان ترمنځ د خبرو اترو به اړه له معلوماتو ورکولو ډډه کړې ده.
د طالبانو مرکزي ویاند یو ځل بیا ټینګار کړی چې له پاکستان سره مهمې سوداګریزې او ترانزیټي لارې یوازې هغه وخت پرانیزي، چې له اسلام اباده قوي ډاډ ترلاسه شي چې د سیاسي یا اقتصادي فشار د وسیلې په توګه به دا لارې بیا نه تړي.
د طالبانو ویاند ذبیح الله مجاهد تېره ورځ اعلان وکړ، چې د پاکستان له خوا د سیاسي او اقتصادي فشار په توګه د سوداګریزو لارو بندولو ددواړو خواوو ولسونو ته درانه زیانونه واړول، خو سره له دې افغانستان توانېدلی د سیمې له نورو هیوادونو خپل واردات پوره کړي.
پاکستان د اقتصادي او امنیتي فشارونو له امله په تیرو کلونو کې وخت په وخت لارې تړلي، خو طالبان ټینګار کوي چې د دوه اړخیزې سوداګرۍ ثبات یوازې د اسلام اباد د باوري ژمنو له لارې ممکن دی.
د افغانستان او پاکستان ترمنځ سوداګریزې لارې له تېرو دوو میاشتو راهیسې بندې دي او طالبانو په دې وروستیو کې سوداګرو ته امر کړی، چې نورې بدیلې لارې ولټوي.
د طالبانو د ادارې چارواکو د نویو بدیلو لپاره د منځنۍ اسیا هېوادونو، ایران او هند ته مخه کړې او ددې ډلې د بهرنیو چارو وزیر د چارشنبې په ورځ وویل، چې د لارو تړل کېدو د افغانستان پر بازار هیڅ منفي اغیز نه دی کړی.
