په اسلام اباد کې د امریکا سفارت چارسمبالې ناتالي بیکر وایي چې د امریکا د صادراتو او وارداتو بانک(یو ایس ایګزم) په بلوچستان کې د مهمو منرالونو د کان کیندنې د ملاتړ لپاره د ۱،۲۵ میلیارد ډالرو تمویل منظور کړی دی. نوموړې دا د دواړو هېوادونو او بلوچستان د پرمختګ لپاره مهم ګام ګڼلی.
بیکر په یوه ویډیویي پیغام کې ویلي چې د ایګزم بانک تمویل به په راتلونکو کلونو کې تر ۲میلیارده ډالرو پورې د کانکېندنې امریکایي وسایل او تخنیکي خدمات د رېکوډېک کان د چارو لپاره پاکستان ته واستوي.
د هغې په وینا، دغه پروژه به په امریکا کې ۶۰۰۰ دندې او په بلوچستان کې ۷۵۰۰دندې رامنځته کړي.
ناتالي بیکر وویل:«رېکوډېک پروژه د کانکېندنې هغو پروژو لپاره یوه نمونه ده چې هم د امریکا صادراتو ته ګټه رسوي او هم د پاکستاني ټولنو لپاره د عوایدو او پرمختګ لامل کېږي.»
هغې زیاته کړې چې د ولسمشر ټرمپ اداره د داسې لویو اقتصادي تړونونو پر پراخولو ټینګار کوي او دا یې د امریکا د بهرنۍ تګلارې مهمه برخه ګرځولې ده.
رېکوډېک د مسو او سرو زرو یو ستر کان دی چې په بلوچستان کې موقعیت لري او د نړۍ د لویو زیرمو په ډله کې شمېرل کېږي.
تېره میاشت د ایګزم بانک مشر جان ژوانوویچ فایننشل ټایمز ورځپاڼې ته ویلي و چې دا بانک به د امریکا او د هغې د متحدینو د عرضې ځنځیرونو د خوندي کولو لپاره په مهمو منرالونو، هستوي انرژۍ او د مایع طبیعي ګاز برخو کې ۱۰۰میلیارد ډالر پانګونه کوي.
د ده په وینا، د پانګونې لومړۍ مرحلې کې به د مصر، پاکستان او اروپا پروژې شاملې وي.
