د تېر جمهوري نظام د ملي امنیت پخواني رییس رحمتالله نبیل د هسپانیا په بهرنیو چارو وزارت کې د «افغان ښځو او نجونو» په نوم د یوې خونې نومول مانا لرونکی نوښت او د درناوي وړ پرېکړه وبلله. د هسپانیا بهرنیو چارو وزارت ویلي، په یاد وزارت کې یوه خونه د «افغان ښځو او نجونو» په نوم نوموي.
رحمتالله نبیل د جمعې په ماخوستن (د لیندۍ ۲۱مه) په خپله اېکس پاڼه د دغه اقدام اړوند د هسپانیا د بهرنیو چارو له وزیر څخه مننه کړې او زیاته کړې یې ده: «په وزارت کې د افغان ښځو او نجونو په ویاړ د یوې خونې نومول یوازې یو سمبولیک عمل نه دی؛ دا یوه ځواکمنه څرګندونه ده، چې پهکې د هغوی مقاومت، زړورتیا او مبارزه لیدل کېږي، دا یاد ساتل کېږي او ورته درناوی کېږي.»
نوموړي په افغانستان کې په سیستماتیک ډول له عامه ژوند څخه د ښځو او نجونو محرومیت ته په اشارې زیاته کړې، چې د هسپانیا دغه دريځ یو روښانه پيغام لري.
هغه لیکلي: «د هسپانیا دریځ یو روښانه پیغام لري، د افغان ښځو او نجونو غږ مهم دی، د هغوی حقوق له خبرو اترو بهر دي او د هغوی مبارزه هېرېدای نه شي.»
د هسپانیا د بهرنیو چارو وزارت ویلي، چې د «افغان ښځو او نجونو» په ویاړ د خونې نومولو دغه سمبولیک اقدام د طالبانو لهخوا د لګول شویو محدودیتونو پر وړاندې د افغان ښځو مقاومت او مبارزې ته د درناوي په موخه ترسره کوي.
له دې سره سم، د هسپانیا د بهرنیو چارو وزیر خوزه مانیول البارس د جمعې په ورځ (د لیندۍ ۲۱مه) په مادرید کې د «زموږ غږ واورئ» درېیمې ناستې د پرانیستونکې وینا په ترڅ کې وویل، چې د طالبانو حکومت هېڅ ډول مشروعیت نهلري او هسپانیا یې په رسمیت نهپيژني.
