ویټامین ډي د روغتیا لپاره ډېر مهم بلل کېږي، ځکه چې پر هډوکو، د بدن پر دفاعي نظام، عضلاتو او روان مثبت اغېز لري. خو ډېری خلک یې په کافي اندازه د لمر له وړانګو یا خوړو له لارې نهشي ترلاسه کولای؛ له همدې امله د ویټامین ډي سپلېمنټونه د دې کمښت د جبران یوه مناسبه حل لاره ګڼل کېږي.
اوس پوښتنه دا ده، چې ایا د ویټامین ډي سپلېمنټونو اوږدمهاله ورځنی استعمال د روغتیا لپاره خوندي او ګټور دی، که یوازې د پیسو ضایع کول دي؟
د ډېری سالمو لویانو لپاره د ویټامین ډي استعمال په ټاکلې او سپارښتل شوې اندازه کې خوندي ګڼل کېږي.
د دغو سپلیمینټونو د ورځني استعمال ځینې ګټې دا دي:
هډوکي قوي کوي
ویټامین ډي د بدن د کلسیم جذب او د هډوکو د پیاوړتیا په برخه کې ډېر مهم رول لري. د دې سپلیمینټونو د اوږدمهاله استعمال په ځانګړي ډول هغه وخت ګټور تمامېږي چې د کلسیم کافي مقدار هم له خوړو یا نورو سرچینو څخه ترلاسه کېږي، ځکه په دې توګه د هډوکو د کمزورۍ او د مړینې د خطر کچه کمېږي. دغه سپلیمینټونه په ځانګړې توګه د منځني عمر ښځو، زړو کسانو او هغو کسانو لپاره ډېر ګټور دي چې لږ لمر ویني یا د لمر د وړانګو له لارې د ویټامین ډي کافي مقدار نه ترلاسه کوي. د دې تر څنګ، دا سپلیمینټونه د بدن دفاعي نظام، عضلاتو فعالیت او حتی د رواني روغتیا د ساتنې لپاره هم مثبت اغېز لري.
د دفاعي نظام فعالیت ښه کوي
څېړنې ښيي، چې ویټامین ډي د بدن د دفاعي سیستم د سالم فعالیت لپاره خورا مهم دی. د دې ویټامین د کمښت له امله د تنفسي ناروغیو او نورو انفکشنونو د رامنځته کېدو خطر لوړېږي. په بل اړخ کې، که د ویټامین ډي سپلیمینټونه په منظم ډول وکارول شي، نو د بدن دفاعي نظام پیاوړی کېږي، د ناروغیو پروړاندې مقاومت زیاتېږي او د عمومي روغتیا په ساتنه کې مهمه مرسته کوي. دا سپلیمینټونه په ځانګړې توګه هغو کسانو لپاره ګټور دي، چې لږ لمر ویني یا د ویټامین ډي کافي مقدار د خوړو له لارې نه ترلاسه کوي، ځکه په دې توګه د بدن مقاومت او دفاعي ځواک دواړه تقویه کېږي.
د عضلو فعالیت او توازن ښه کوي
د ویټامین ډي کمښت نه یوازې د هډوکو لپاره ستونزې رامنځته کوي، بلکې د عضلاتو د کمزورتیا لامل هم ګرځي او په ځانګړې توګه د زړو کسانو د لوېدو او ټپي کېدو خطر لوړوي. د دې ستونزې د مخنیوي لپاره، د ویټامین ډي سپلیمینټونه ګټور ګڼل کېږي، ځکه چې دا د عمر په زیاتېدو سره د عضلاتو د ځواک او فعالیت په ساتنه کې مرسته کوي، د بدن تعادل ښه کوي او د لوېدو احتمال کموي. په دې توګه، منظم سپلیمینټ کارول د زړو کسانو د روغتیا او خپلواکي په ساتنه کې مهم رول لري.
پر روان او دماغي روغتیا هم اغېز لري
ویټامین ډي یوازې د هډوکو او عضلاتو لپاره مهم نه دی، بلکې د دماغ د روغتیا لپاره هم حیاتي رول لري. څېړنو ښودلې، چې د ویټامین ډي کمښت د خپګان او ځینو نورو رواني ستونزو له رامنځته کېدو سره تړاو لري، که څه هم د دې پایلې تل یو شان نه وي او په ټولو خلکو کې ورته اغېز نه ښيي. بیا هم، د ویټامین ډي مناسبې کچې ته رسول او د سپلیمینټونو منظم استعمال د دماغي روغتیا، ښه مزاج او د رواني ستونزو د کمښت لپاره ګټور ګڼل کېږي.
د اوږدمهالو ناروغیو خطر کموي
څېړنې ښيي، چې د ویټامین ډي کمښت د بدن په اوږدمهالو روغتیايي ستونزو اغېز کولی شي. په ځانګړې توګه د ویټامین ډي کموالی د هډوکو نریوالي (اوستيوپروز)، دویم ډول شکر (ډایبېتس) او د زړه د ناروغیو د رامنځته کېدو خطر زیاتوي. له همدې امله، د دې ویټامین مناسب کچه نه یوازې د هډوکو د پیاوړتیا لپاره اړینه ده، بلکې د اوږدمهاله ناروغیو د مخنیوي لپاره هم حیاتي رول لوبوي.
هره ورځ څومره ویتامین ډي وخوړل شي؟
ډېرې طبي ادارې وايي، چې د نړۍوالو معیارونو پر بنسټ د ویټامین ډي مناسبه ورځنۍ اندازه د عمر او وضعیت له مخې داسې ده: د ۷۰ کلونو څخه کم عمر کسانو لپاره شاوخوا ۶۰۰ واحده، د ۷۰ کلونو څخه پورته کسانو لپاره ۸۰۰ واحده او د منځني عمر ښځو او هغو کسانو لپاره چې لږ لمر ویني یا د ویټامین ډي کمښت لري، د ۱۰۰۰–۲۰۰۰ واحدو ترمنځ سپارښتنه کېږي.
