له نن څخه پوره ۴۶ کاله مخکې په ۱۳۵۸ لمریز کال کې سره پوځ د ټولو نړۍوالو موازینو پر خلاف او د وخت د کمونیستي حکومت په ملتیا پر افغانستان یرغل وکړ. سور پوځ په افغانستان کې له نږدې ۱۰ کلن حضور وروسته د افغان ولس د پراخ مقاومت په پایله کې له دغه هېواد څخه پښې سپکې کړې.
سرو پوځونو پر افغانستان په یرغل سره په لومړي ګام کې د وخت ولسمشر حفیظالله امین د دارالامان په تاج بېک ماڼۍ کې لومړی مسموم بیا یې وواژه او د نوموړي سل ورځنی حکومت ته یې هم د پای ټکی کېښود او د خلق ډېموکراټيک ګوند پرچم څانګه د ببرک کارمل په مشرۍ واک ته ورسېده .
د شمېرو لهمخې، د پخواني شوروي اتحاد شاوخوا ۱۱۰ زره سرتېري ۹ کاله، لس میاشتې او څو ورځې په افغانستان کې وجنګېدل او غوښتل یې په سیمه کې د افغانستان له لارې یو سوسیالیستي نظام حاکم کړي، خو د پخواني شوروي دغه یرغل د افغانستان له پراخ مقاومت سره مخ او بالاخره له نږدې لسو کلونو وروسته له ماتې سره مخ شو .
پر افغانستان د پخواني شوروي د نږدې لس کلن یرغل په پایله کې څه باندې یو میلیون افغانان ووژل شول او څه باندې ۳ میلیونه نور افغانان ټپيان او د خپلو کورونو پرېښودو ته اړ شول او همداراز ۱۵ زره د یرغلګرو ځواکونو سرتېري ووژل شول .
د چارو شنونکي وايي، پر افغانستان د پخواني شوروي اتحاد یرغل، د هېواد سیاسي، ټولنیزې، اقتصادي او امنیتي برخې سختې زیانمنې کړې او ورسره افغانستان یوې اوږدې او ستړې کوونکې جګړې ته دننه کړ.
