د افغانستان کرېکټ بورډ اعلان کړی چې د ملي لوبډلې چټک توپاچوونکی نوین الحق د ښي لاس د اوږې د ټپ له کبله نه شي کولی د ویسټ انډیز پر وړاندې د لوبلړۍ او همدارنګه د راتلونکي شل اوریز نړیوال جام سیالیو کې ګډون وکړي، او پر ځای یې د لوبډلې په نوملړ کې بدلون راغلی دی.
د افغانستان کرېکټ بورډ د معلوماتو له مخې، د اړوندو ډاکټرانو د طبي راپور پر بنسټ د نوین الحق د ښي لاس د اوږې په هډوکي کې د ډېر فشار له امله رامنځته شوی درز (سټریس فریکچر) لا هم په بشپړ ډول نه دی رغېدلی. ویل شوي چې نوموړی لا هم درد لري او د لا ښې درملنې لپاره انګلستان ته استول شوی دی.
کرېکټ بورټ وایي، د همدې طبي ستونزې له امله، نوین الحق به ونه شي کولی د ویسټ انډیز پر وړاندې د راتلونکې لوبلړۍ او د شل اوریز نړیوال جام سیالیو برخه وي.
د افغانستان کرېکټ بورډ د غوراوي کمېټې د پرېکړې له مخې، د نوین الحق پر ځای ضیاءالرحمن شریفي، چې مخکې د احتیاطي لوبغاړو په نوملړ کې شامل و، اصلي نوملړ ته ورزیات شوی دی. همدارنګه، د ضیاءالرحمن شریفي پر ځای فرید ملک د احتیاطي لوبغاړو په نوملړ کې شامل شوی دی.
کرېکټ بورډ وایي، د لوبغاړو روغتیا ته په کتو دا بدلونونه ترسره شوي او هڅه کېږي چې د راتلونکو سیالیو لپاره بشپړ چمتووالی وساتل شي.
