روسیه وايي چې په مسکو کې پر جګپوړي روسي جنرال د برید عامل یې له دوبۍ رالېږدولی
د روسیې امنیتي چارواکو او پلټونکو د یکشنبې په ورځ وویل، چې یو اوکرایني الاصله روسی چې د روسیې د استخباراتو پر مرستیال په برید کې ښکیل دی، له دوبۍ نه مسکو ته لېږدول شوی.
د روسیې امنیتي چارواکو او پلټونکو د یکشنبې په ورځ وویل، چې یو اوکرایني الاصله روسی چې د روسیې د استخباراتو پر مرستیال په برید کې ښکیل دی، له دوبۍ نه مسکو ته لېږدول شوی.
ډګر جنرال ولادیمیر الکسییف د جمعې په ورځ د مسکو په شمال کې د ولوکولامسک پر لویه لار په یوه اپارتماني ودانۍ کې د بې غږه مکاروف تومانچې په دریو ډزو ویشتل شوی و، خو له عملیاتو وروسته اوس هغه بېرته په سد شوی او خبرې کولای شي.
د روسیې د فدرالي امنیتي خدماتو ادارې ویلي، چې د لیوبومیر کوربا په نامه یو روسی وګړی په دوبۍ کې د یاد برید د ترسره کولو په شک نیول شوی دی.
روسي رسنیو داسې انځورونه خپاره کړي چې د فدرالي امنیتي خدماتو پټمخي افسران پکې په تیاره کې له یوې وړې الوتکې څخه یو سړی بدرګه کوي. د یاد کس پر سترګو پټۍ تړل شوې.
یادې ادارې ویلي چې دوی د نوموړي دوه نور همکاران هم پېژندلي دي، چې دواړه روسي وګړي دي.
د پلټونکو په وینا، یو یې ویکتور واسین په مسکو کې نیول شوی، خو بله یې زینایده سیریبریتسکایا اوکراین ته تښتېدلې ده.
رویټرز وايي، ونه توانېد چې د شکمنو کسانو په اړه معلومات په خپلواکه توګه تایید کړي.
د روسیې د بهرنیو چارو وزارت وویل، چې ولسمشر ولادیمیر پوتین د متحده عربي اماراتو له مشر شیخ محمد بن زاید ال نهیان څخه د شکمن کس په نیولو کې د همکارۍ له امله مننه کړې ده.
متحده عربي اماراتو د کوربا د نیولو د څرنګوالي په اړه نور جزییات نه دي خپاره کړي.
روسیې په برید کې اوکراین ښکیل ګڼلی، خو اوکراین خپله ښکیلتیا رد کړې ده.
