د طالبانو د کار او ټولنیزو چارو وزارت ویلي، د ترکیې او نورو هېوادونو لپاره د کاري ویزو د غیرقانوني صدور او تور بازار په تړاو یې د سیاحتي او زیارتي شرکتونو استازي او مسئولین احضار کړي. دغه وزارت په کابل کې د یادو شرکتونو استازو ته د احضار استعلامونه سپارلي او پوښتنې یې ترې کړې دي.
د طالبانو دغه وزارت په خبرپاڼه کې ویلي، چې له حاضرو شویو استازو څخه یې لیکلې ژمنې اخیستي دي. طالبان وایي، د تعهد له مخې دغه شرکتونه به د کاري ویزو په برخه کې له خلکو پیسې نه اخلي، د خلکو د شکایتونو په څېړنه کې به له وزارت سره پوره همکاري کوي او په دې تړاو به هېڅ ډول غیرقانوني فعالیت نه ترسره کوي.
د کار او ټولنیزو چارو وزارت ټینګار کړی چې د کاري ویزو په برخه کې د تور بازار مخنیوی کوي او اړوند سرغړونې به تعقیبوي. د دې وزارت چارواکو په یو ویډيو پېغام کې زیاته کړې چې د شکایتونو د ثبت لپاره به لارې چارې فعالې وي او د تورنو قضیې به قانوني څارنې لپاره خپلو اړوند ادارو ته سپاري.
طالبانو له خلکو په جدي توګه غوښتي چې د جعل او دروغو ښکار نه شي او په دې برخه کې خپل اسناد او پیسې هېڅ شخص، شرکت او یا بل ادرس ته ورنه کړي. د خبرپاڼې له مخې، مشکوک موارد دې له قانوني مراجعو سره شریک شي څو د کاري ویزو په نوم د خلکو د غولونې مخه ونیول شوي.
په دې وروستیو کې اندېښنې ډېرې شوې چې په افغانستان کې د ترکیې، پاکستان او ایران ویزې په تور بازار کې په زرګونو ډالرو پلورل کېږي. همدا راز نیوکې شوي چې یو شمېر سیاحتي شرکتونو پر همدې بهانو خلک لوټلي او پیسې یې ترې شکولي دي، خو خدمتونه یې ورته نه دي وړاندې کړي.
طالبانو له واک ته رسېدو وروسته یو پراخ کمپاین پیل کړی چې د افغانستان ځوانان د طالباني تفکر پر لور جذب کړي، خو دې هڅو سره له دې چې د هېواد ستونزې نه دي اوارې کړي بلکې وضعیت یې لا نور ترینګلی کړی دی.
په تېرو دریو کلونو کې د دیني مدرسو شمېر د تېرو شلو کلونو پرتله پنځه برابره زیات شوی، چې اوس یې شمېر نږدې ۷۰۰۰ ته رسېدلی او لا هم زیاتېږي. افغانان اړ دي چې خپل اولادونه ښوونځي ته ولېږي، آن که دا ښوونځی مدرسه هم وي.
د طالبانو د پوهنې وزارت د مدرسو او دارالحفاظونو مشر عبدالرزاق صدیق رسنیو ته ویلي و: «افغانستان یوه مذهبي ټولنه ده او هر کس باید لومړنۍ او د لوړې کچې دیني زدهکړې ولري. له همدې امله موږ د دیني مدرسو وده ضروري بولو».
خو دا فکر آن د طالبانو دننه هم پراخ ملاتړ نه لري. ځینې طالب چارواکي وایي چې افغانستان یوازې طالب او ملا ته اړتیا نه لري بلکې انجینرانو او ډاکټرانو ته هم اړتیا ده. دا وضعیت نړۍ ته یو انزوا طلبه او افراطي افغانستان معرفي کوي چې نه یوازې کولتوري ستونزې لري، بلکې سیمه او نړۍ ته قوي امنیتي ګواښ هم پېښولی شي.
که څه هم افراطي فکرونه پراخېږي، خو ټکنالوژي دا وړتیا لري چې له افراطیت سره مبارزه وکړي. انټرنټ او رسنۍ هغه څه دي چې په اوسني عصر کې ورسره ځوانان په بېلابېلو ډولونو نښلول شوي دي. د شمېرو له مخې، د افغانستان ۶۷ سلنه وګړي لږ تر لږه میاشت کې یو ځل ټلوېزیون ګوري، چې دا ۱۲ میلیونه ماشومان او ۱۴ میلیونه ځوانان رانغاړي.
نجیب پیکان زیاتوي، چې تر ټولو مهمه مسئله له دې ځوانانو سره د اړیکو جوړول دي: «افغان ځوانان په دوو برخو وېشل کېدای شي. لومړی، تحصیلکرده او ناراضه ځوانان دي چې په میدان یوازې پرېښودل شوي او د بدلون ځواک یې له لاسه ورکړی. دا هغه ځوانان دي، چې که څه هم ناهیلې دي، خو د ځان ژغورلو یوازینۍ لاره د آزادې نړۍ سره همکاري ګڼي.دویم، هغه ځوانان دي چې د طالبانو په اداره کې دي؛ هغوی افراطي شوي. هر کال نیم میلیون طالبان له مدرسو فارغېږي او د افراطیت پر لور ګام اخلي.»
د حالاتو د بدلون لپاره باید له دواړو ډلو سره کار وشي. تر ټولو مهمه لاره دا ده چې د رسنیو، خبرو اترو، کنفرانسونو او مشورو له لارې د ځوانانو ترمنځ پل جوړ شي، ترڅو هغوی انتقادي فکر ته وهڅول شي او خپل بحثونه له دین او آخرت څخه ور هاخوا هم وغځوي.
دا ځوانان کار غواړي، او د کار موندلو لپاره اړیکو ته اړتیا لري. له هغو هېوادونو درس اخیستل کېدای شي، چې د ځوانانو کچه پکې لوړه ده، او دغه ځوانان د سمې لارې پر لور هڅول کېدای شي.
