په نيويارک کې د کښتيو جوړونې په کارخونه کې د چاودنې له امله ۱۶ کسان ټپیان شوي
د امریکا د نیویارک ښار په سټېټن ایلنډ کې د کښتيو جوړونې په یوې کارخونه کې د اور لګېدنې او چاودنې له امله لږ تر لږه ۱۶ کسان ټپیان شوي دي. د چارواکو په وینا، د درېیو ټپیانو روغتیايي وضعیت ډېر نازک دی.
د امریکا د نیویارک د اور وژنې اداره وايي، دغه پېښه د جمعې په ورځ شاوخوا ۳:۳۰ دقیقې هغه مهال رامنځته شوه چې، د یادې ادارې کارکوونکو په دغې کارخونه کې په اور کې د بند پاتې دوو کارګرو پر ژغورنې بوخت وو.
د اور وژنې د ادارې ویاندې جوان ماریانو وویل، کله چې د اور وژنې ډلې لا هم د اور په مړه کولو بوختې وې، شاوخوا ۵۰ دقیقې وروسته په ساحه کې یوه لویه چاودنه وشوه.
ماریانو زیاته کړه، دغه اور په ځايي وخت د مازدیګر تر ۵ بجو پورې لا نهوو مړ شوی او د یادې ادارې کارکوونکو په ساحه کې ۱۶ ټپیان شمېرلي وو. د نوموړي په وینا، په ټپیانو کې د دوو اور وژونکو او یوه ملکي وګړي روغتیايي وضعیت ډېر نازک ښودل شوی دی.
تر اوسه د پېښې د رامنځته کېدو د څرنګوالي او همداراز د نورې احتمالي اوښتې مرګژوبلې په تړاو څه نهدي ویل شوي.
