د پښتون ژغورنې غورځنګ مشر منظور پښتین د یوې پښتنې ماشومې او د هغې د مور د تښتولو او شکنجې په اړه د اندېښنې په څرګندولو پر فیسبوک پاڼه (میټا) لیکلي، که د خیبر جرګې پرېکړې عملي شوې وای؛ نو نن به پښتنو خپل متحد مرکز او منظم خوندیتوب لاره.
هغه ویلي: «د یوې ۱۱ کلنې پښتنې نجلۍ تښتول، بندي ساتل، بیا یې مور وربلل او پر هغوی ظلم د جدي اندېښنې وړ خبره ده او د پاکستان امنیتي ادارو چوپتیا په پېښه کې د هغوی د ښکېلتیا په معنا ده».
د نوموړي په خبره؛ د پښتنو تښتول یوازې «د سند مافیايي غلو» کار نهدی؛ بلکې د پاکستان پوځ او استخبارات هم ورسره لاس لري. پښتین زیاته کړې، د پاکستان پوځ په باجوړ کې د ښوونځي پر کم عمره ماشومانو پر ډرون بریدونو بوخت دي چې له امله یې دوه پښتانه ماشومان د پاکستان پوځ د بېپیلوټه الوتکو په بریدونو کې وژل شوي.
هغه ویلي: «د پاکستان امنیتي ادارې د دې پر ځای چې پښتنو ته امنیت ورکړي، د شمالي وزیرستان د شوا، سپینوام او دتهخېلو سیمو پر خلکو د توغندیو او ډرون بریدونه کوي او خلک له خپلو کورونو او سیمو بېځایه کوي؛ څو هلته شته کاني سرچینې په اسانه لوټ شي او څوک غږ پورته نهکړي».
هغه ویلي، دوه ورځې وړاندې په پېښور کې فرید اپریدی او پنځه میاشتې مخکې نورالله ترین او حنیف پښتین تښتول شوي چې لاتراوسه لادرکه دي. نوموړي د کم عمرې پښتنې ماشومې او د هغې له کورنۍ سره د غمرازۍ په پيغام کې ویلي، چې غورځنګ یې په سند کې له مسوولو کسانو سره په اړیکه کې دی او په دې اړه به له جدي اقداماتو کار واخلي.
