کرېسټیانو رونالډو د سعودي عربستان په فوټبال لیګ کې د النصر لوبډلې اتلولي ونمانځله
د سعودي عربستان د فوټبال د مسلکي لیګ د سیالیو په وروستۍ اوونۍ کې النصر فوټبال لوبډله د کرېستیانو رونالډو په ځلېدونکې لوبې سره وتوانېده، چې زماک لوبډلې ته څلور پر یو ماتې ورکړي او د ۸۶ امتیازونو په ترلاسه کولو سره د دغه سیالیو اتلولي خپله کړي.
په دغه لوبه کې کرېستیانو رونالډو د دویمې پاڼۍ په ۶۲ او ۸۰ دقیقو کې دوه ګولونه ووهل. د النصر لوبډلې نور دوه ګولونه سادیو مانه په ۳۳مه دقیقه او کېنګزلي کومان په ۵۱مه دقیقه ترسره کړل.
رونالډو د دغه دوو ګولونو په وهلو سره د خپلو ټولو ګولونو شمېر ۹۷۳ ته ورساوه.
د دغه لیګ په بله لوبه کې الهلال چې د اتلولۍ بل سیال ګڼل کېده، الفیحا ته یو پر صفر ماتې ورکړه او د ۸۴ امتیازونو په لرلو سره یې دویم ځای خپل کړ. د تېرو دوو اسیایي لیګونو اتل الاهلي بیا په ۸۱ نمرو سره درېیم ځای ته راغی.
