افغان کارګر: په متحده عربي امارات کې د اقامې او وېزو د تمدېد له سختو ستونزو سره مخ یو
په متحده عربي اماراتو کې مېشت یو شمېر افغان مساپر او کارګرو ویلي، چې په یاد هېواد کې د ویزو او اقامې د تمدېدو او بدلون له جدي او قانوني ستونزو سره مخ دي.
د یادو مساپرو په وینا، هغه کسان چې خپله ویزه له یوه ځایه لغوه یا «کنسل» کړي، کله چې په بل ځای کې د نوې ویزې یا اقامې لپاره غوښتنه وکړي، بېرته یې غوښتنلیک ردېږي.
په متحده عربي اماراتو کې مېشت افغان مسافر وایي، د یاد هېواد ادارې ترې غواړي چې د طالبانو اړوند قونسلګرۍ یا سفارت ته مراجعه وکړي، هلته ځان ثبت کړي او بیا له افغانستان څخه خپل اسناد او معلومات ترلاسه کړي.
دوی زیاتوي چې د قونسلګرۍ د ثبت بهیر ډېر وخت نیسي او کله ناکله یوه میاشت دوام کوي ترڅو اړوند اسناد له افغانستان نه راورسېږي. د دوی په خبره، په همدې موده کې پر هغو کسانو چې ویزې یې پای ته رسېدلې وي، هره ورځ ۵۰ درهمه جریمه لګېږي.
ځینې افغان کارګر وایي چې میاشتنی عاید یې یوازې ۹۰۰ یا ۱۰۰۰ درهمه دی او د ورځني ژوند لګښتونه هم په سختۍ پوره کوي، خو د ویزو جریمې او قانوني ستونزې یې اقتصادي فشارونه نور هم زیات کړي دي.
دغه افغان مسافرو له طالبانو غوښتي چې د دوی ستونزو ته جدي پاملرنه وکړي او په متحده عربي اماراتو کې د افغانانو د اقامې او وېزو د ستونزو د حل لپاره له اماراتي چارواکو سره خبرې وکړي.
د یادونې وړ ده چې دا په متحده عربي اماراتو کې د یو شمېر مساپرو روایت دی، افغانستان انټرنشنل پښتو دا په خپلواکه توګه نشي تاییدوی.
