د افغانستان د ولسمشرۍ ماڼۍ د دفتر پخواني رییس محمد عمر داوودزي له کابل سره د تاشکند پر سوداګریزو اړیکو خوښي ښودلې او دا یې ښه اقدام بللی دی. هغه په خپله اېکسپاڼه لیکلي، چې یوازې تلپاتې اقتصاد او پانګونې کولای شي افغانستان له اوسني وضعیت څخه وباسي.
محمد عمر داوودزي د جمعې په ورځ (د غبرګولي لومړۍ) په خپله اېکسپاڼه ټینګار کړی، چې هېوادونه په «خیراتونو» نهجوړېږي، بلکې د کاري زمینو برابرول او پانګونې د پرمختګ لامل کېږي. هغه زیاته کړې، چې ازبکستان په وروستیو کې د افغانستان لپاره د سیمې د یوه رغنده او بېپرې شریک په توګه راڅرګند شوی دی.
د داوودزي په وینا، افغانستان او ازبکستان یوازې ګډه پوله نه، بلکې ګډ تاریخ، فرهنګ او اقتصادي ګټې لري. هغه ویلي، چې دواړه هېوادونه د سیمې د سولې او ثبات لپاره مسوولیت لري او د جیوپولیټیکي بېثباتۍ په اوسني وخت کې د اړیکو پیاوړتیا د دواړو لورو په ګټه ده.
د ولسمشرۍ ماڼۍ د دفتر پخواني رییس همدارنګه څرګنده کړې، چې د کابل او تاشکند دا اړیکې د مرکزي او سویلي اسیا د راتلونکې لپاره حیاتي ارزښت لري. هغه غوښتنه کړې، چې د دغو دوو ګاونډیو هېوادونو ترمنځ اړیکې باید دومره بنسټیزې شي، چې د نظامونو له بدلونونو څخه اغېزمنې نهشي او نورو ته یو ښه مثال جوړ کړي.
د ازبکستان د سوداګرو یوه پلاوي تېره ورځ (پنجشنبه) په کابل کې د افغانستان د سوداګرۍ خونې له غړو سره په ناسته کې خبر ورکړی، چې تاشکند پلان لري په بېلابېلو ولایتونو کې د نساجۍ، کرنې او روغتیايي وسایلو په برخو کې پر لویو فابریکو پانګونې وکړي. دغه پلاوي نن (جمعه) په ننګرهار کې هم د طالبانو له ځايي چارواکو او د درملو له ټولنې سره په ګډو سوداګریزو همکاریو او د پانګونې پر فرصتونو خبرې کړې دي.
